獨家丨馮盈盈單身3年拒跟圈中人拍拖揭「性博士」拍親熱戲尷尬之謎

2024-01-10 07:00

2016年港姐冠軍馮盈盈的言行一向出位，更曾被封為「性博士」，不過提到在首演女一的劇集《妳不是她》中跟丁子朗有大量親熱戲，今年踏入30歲的盈盈竟然覺得超尷尬，更首度澄清以往出口成「性」，只是節目效果需要，私底下絕對相反。單身3年的她更落閘圈中人追求，情傾識諗的圈外人。採訪：杜杜攝影：羅安強形象:@pelilam服飾:Max&Co、@marcellaleung_jewellery

踏入新一年，盈盈希望嘗試做打女或奸角，更想學以致用主持有關營養學節目。

自2021年拍畢《智能愛人》後，盈盈相隔3年才有新劇推出，更首做女一，她承認壓力超大，幸好是愛情劇，加上監製陳萍安排她跟飾演同居男友的丁子朗「拍拖一日」作實習，「預備咗氣球、鮮花、禮物、蛋糕，再行街、睇戲、食飯、行沙灘、坐摩天輪，好似拍一日拖咁，同丁丁建立默契，感覺熟啲，埋位唔會好陌生。」劇中她跟丁子朗有大量親熱戲，盈盈表示超尷尬，「始終都係女仔嘛！拍嘅時候亦都唔係大家睇見咁浪漫，有10幾20個工作人員圍住，要克服心理障礙，旁若無人豁出去。」她要感謝女監製會親身試位，「我會更加放鬆，同丁丁做嘅時候更加順利。」

訪問當日，盈盈言行大方得體，跟以往浮誇態度截然不同。

開拍前監製安排盈盈和丁子朗拍拖一日，行沙灘唔少得。

本色演出「夏莉」

估不到一向言行大膽的盈盈，拍親熱戲會好驚青，她首度解釋真實的她絕不口沫遮攔，「一路以嚟言論可能比較大膽，都係符合返節目要求，好似之前主持啲清談節目《後生仔傾吓偈》，或者上遊戲節目要搞笑。」盈盈表示真實的她，跟劇中車禍前的「夏莉」最似，「唔係幾出聲，比較保守、沉穩。」連胞弟亦指她本色演出，「播出第一集見到斯文嘅我，細佬就話『呢個完全係平時屋企嘅你，唔多出聲好cool，沉默寡言，冇乜表情，本色演出喎』。」盈盈再強調，「嗰個先係真正嘅我。」她解釋受出道作品所累被外界誤解，「一出道就拍《果欄中的江湖大嫂》，做一個比較爆嘅角色『小狼女』，一嚟主持《千奇百趣特工隊》遊戲綜藝節目，我係新人啱啱接觸呢啲工作，諗緊點樣投入角色，係咪要迫自己佻皮啲，energy高啲hyper啲，好似要炒熱個氣氛，可能因為咁樣定型咗形象。」

盈盈跟丁子朗飾演同居情侶，有不少牀上親熱戲。

自言保守的盈盈，要跟丁子朗拍親熱戲，要衝破心理關口。

進修性情大變

除了幕前演出，盈盈的社交平台或受訪時，亦表現得好非一般，她承認入行初期受氛圍影響，力指非真實的她，「都知大家期望係咁，我都會受到感染比較hyper，𠵱家慢慢展現返真實一面都係好事。」她就否認因被勸告才收歛，完全是想法有變，「都大個女，下年（2024年）都30歲，雖然我唔覺得係一個好大嘅關口，之前返咗去讀書（營養學碩士），令我喺思想、性格上有啲變化，好似沉穩咗啲，更加係我最真實嗰面。」訪問當日盈盈坐得斯文淡定，的確跟以往判若兩人。

盈盈早前重返校園，修讀營養學碩士課程。

盈盈以往不時在社交平台派福利，性感相唔難搵。

主持《後生仔傾吓偈》時的出位言詞，盈盈解釋只為節目效果。

搵圈外人拍拖

劇中盈盈跟丁子朗好Sweet，現實已單身3年，唔急拍拖的她對另一半的要求較以前更清晰，「一定要思想成熟，情緒穩定，EQ高情商高，識得包容我，體諒我，尊重我，特別係我做緊嘅工作，始終做藝人有好多唔容易嘅地方，開工時間日夜顛倒，如果另一半唔識從我角度出發，體諒我嘅話，好難相處。」她認為跟圈外人拍拖會更適合，「我都有諗過圈內人唔係會更加明白工作難處？！但係圈內人開工時間都好唔穩定，兩個都難夾嘅話，點會抽到時間相處？！始終一段關係都要抽時間培養同經營，搵一個成熟嘅圈外人體諒自己，係理想嘅條件。」