獨家丨KC高票封最佳男友 亨仔超搶口瘋狂得罪人 《造星V》5子沖繩首拍綜藝互爆私密事

5位《造星V》囝囝黃家灝（KC）、陳鎮亨（亨仔）、王希晉、田曜誠（Tsoul）和卓金樂（Kim），簽約Viu後首項任務是拍綜藝節目《沖繩任你點》。朝夕相對12日，5子笑言睇清大家真面目，唔介意互爆私密事，KC更高票數當選最佳男朋友。另外，他們預告將以不同團隊出道，新歌已製作中。採訪：廖思慧、杜杜 攝影：Stanley服裝: Rickyy Wong、Pedro(KC)；AMBUSH from Farfetch、Tommy Hilfiger(亨仔)；Mostly Heard Rarely Seen from Farfetch、Rickyy Wong、Pedro(希晉)；Crenshaw Skate Club and AMBUSH from Farfetch、Pedro(Tsoul)；Heliot Emil and AMBUSH from Farfetch、Rickyy Wong、Pedro(Kim)

Tsoul、KC、希晉、Kim和亨仔希望下次原班人馬拍港版《不准笑》或跟「無制限」團隊去大冒險，講明唔怕玩笨豬跳。

黃家灝（KC）

陳鎮亨（亨仔）

王希晉

田曜誠（Tsoul）

卓金樂（Kim）

 5子在節目中要考執生能力，亦有不少挑戰，希晉和 Kim因不熟水性超驚。童年玩水上滑梯浸親的希晉說：「着救生衣玩香蕉船要飛落海好驚，後尾發現唔係咁驚，落咗水閉一閉氣就浮返上嚟。」Kim玩噴射飛行亦嚇親，「我係第一次玩亦都係第一個玩，都唔知點玩，叫我反轉就反轉囉！」亨仔讚自己玩得叻，「我撐到10幾秒，最勁，大家估唔到我係最犀利嗰個，雖然我最肥。」而KC最大挑戰是曬後皮膚敏感，算是工傷，Tsoul亦估唔到咁誇張，更以關公形容，KC稱手腳還好，但面最嚴重，就算戴帽同眼鏡都搞唔掂，更試過拍完坐低流鼻血，原來燥得滯，「成個節目冇乜點化妝，日照太勁，塊面皮膚敏感會腫，個人脹咗咁。」

對於要扮卡通人物，5子覺得好過癮，完全唔尷尬。

打Golf當日超好天，難怪KC會曬到皮膚敏感。

希晉被狂窒成箭靶

參加《造星V》相處時間長，但冇一齊生活過，5子稱在沖繩同居12日急速了解。要他們互爆秘聞，希晉慘成箭靶，KC先出手，「佢污糟，着住對鞋喺房周圍走。」亨仔再補刀，「佢個腦function唔到同時做兩樣嘢，叫佢左右手各拎啲嘢，會成個企喺度！所以成日唔見電話銀包。」KC補充，「佢又差啲唔見身份證。」希晉澄清：「唔係唔見，唔記得咗啫！」睇住5子自相殘殺好好笑，稱他們跟《造星V》時感覺唔同哂，亨仔承認：「嗰時講嘢好客氣。」Tsoul即窒亨仔：「你嗰時講嘢都唔係咁。」搵到位入的希晉即出聲：「係囉！𠵱家成日窒住晒，成個行程亨仔係咁窒我。」亨仔反駁：「唔窒你窒邊個啫！」大家異口同聲笑指得希晉反抗唔到。

Tsoul行開型格路線，對於扮蒙羅麗莎，笑稱碎料。

在貓島之稱的奧武島拍攝，5子一樣要扮鬼扮馬。

亨仔唔認衰狂辯駁

見亨仔咁得戚，Kim忍唔住爆料，「大家啲鼻鼾太嘈，我搬出廳瞓，拍完返嚟污糟，佢就一嘢撻落梳化瞓。」亨仔超搶口：「咁梳化係攞嚟瞓㗎啦！」Kim嬲爆：「我攞嚟瞓嘛大佬！」希晉乘機踩多腳：「仲坐落佢個枕頭！哈哈！」亨仔越講越衰：「除晒衫褲㗎我！」大家即起哄：「仲衰！」記者主持公道：「你個身有汗！」亨仔終認衰，「咁都係嘅，咁講返聲唔好意思囉！」另外，KC亦爆Kim烏龍事，將亨仔內褲誤放入他的篋，亨仔搶攻：「咁大條點會係KC呀！」KC即反抗：「咩呀！應該再大條先係我嘅，哈哈！」

5子一身《超級戰隊》系列造型，可能件衫超貼身為怕尷尬要外加短褲。

5子到當地藝人學校交流，寓工作於學習。

KC鼻鼾超勁被嫌棄

獲讚好企理的KC亦有缺點，亨仔說：「唔好見KC咁靚仔，佢鼻鼾係最勁嗰個，黐線㗎！我有晚要戴AirPods Max瞓，頂唔順，佢同Kim交響樂咁，真係發脾氣。」雖然有不滿，但若要介紹男仔畀妹妹，亨仔依然投KC一票，「心地好係緊要，溫柔又善良，佢又咁錫女朋友，有辦喺度。」希晉及Kim冇異議，而Tsoul就投亨仔，「佢咁好笑，同佢一齊應該好開心，做伴侶過世，梗係要搵個𠱁到你80歲都笑。」而獲封最佳男友的KC笑言：「我唔會讓我個妹畀你哋班躝癱，哈哈！希晉啦！呃晒佢啲錢。」希晉弱弱反駁，「嘩！咁貪財！」

Tsoul和希晉學空手道，個樣好認真喎！

希晉、Kim和亨仔學習沖繩傳統樂器三線。

講到Taco簽約Sony新廠牌Green Music，成為首個簽唱片公司的《造星V》囝囝，問到五子會否羨慕？希晉先問工作人員再公佈喜訊，「我哋下年（2024年）會出歌，期待吓，在坐都有份。」據知5子是以不同團隊形式出歌，由公司主理。

紮染亦是沖繩的傳統技術，5子亦有親身體驗。

《星島頭條》新網站有更多精彩內容：http://www.stheadline.com/