獨家丨丁子朗決心：唔想衰畀香港人同公司睇 選《超星團》被高層勸退收網民負評
2023-12-28 07:00 
26歲丁子朗2016年參加《香港先生選舉》奪亞軍入行，入行7年一直發展不俗，最近推出新劇《妳不是她》已穩坐男一位置，但早前卻參加選秀節目《亞洲超星團》做練習生從新出發，原來做男團一直是他夢想，就算公司高層曾勸退怕他出醜，亦收到不少網民負評，反而令他更有決心證明自己。採訪：杜杜 攝影：Stanley
子朗坦承最初去試鏡做「超星練習生」，只是應公司要求，沒抱太大期望，後期才被高層說話撻着爭勝心，「今年年頭公司見我25歲樓下，就叫我去試吓，我同公司最初都冇乜期望，入圍後公司有啲聲音話『你真係決定參加？唔好出醜喎！你係代表緊公司同埋香港去』有少少勸退，既然主辦方畀得我入圍，就要全力以赴。」
感激黃宗澤出手助試鏡
外界有不少聲音，認為子朗已做埋主角，為何要由零開始咁傻？原來他一直有個男團夢，「15、16歲參加過韓國公司SM面試，咩都唔識衰咗，呢幾年忘記咗呢個初心，今次係好機會實現10年前夢想，相信呢個係我人生第1次參加選秀，亦係最後一次嘞！同埋唔係返唔到轉頭，我唔想將來後悔。」當時正在成都拍內地劇《暗戀者的救贖》的子朗，更多得同劇的前輩黃宗澤幫助準備試鏡，「初頭佢都係勸退『 靚仔，試吓就算，唔啱你不如唔好去嘞，返嚟拍戲可能仲好呢』但當佢知我下定決心， 唔想衰畀香港人同公司睇，就即刻好支持，我哋食緊飯佢都即刻打電話，用佢嘅人脈搵咗成都嘅舞社畀我學跳舞。」
對於參賽後收到不少負評，子朗完全冇因而影響情緒，更成為他進步的動力，「真係唔可以用負評嚟形容，只不過喺網絡世界大家發表自己意見，我好少聽到身邊人以外咁多朋友畀意見我，我都係改變緊嘅階段，都唔知好定唔好，譬如髮色都試咗3、4個，網民嘅意見咁樣好啲，咁樣做核突喎！我咪知囉，唔止外形，跳舞唱歌網民真係識嘢，我真係虛心接受呢啲意見，會睇晒佢哋啲留言，真係好有創意。」
《星島頭條》新網站有更多精彩內容：http://www.stheadline.com/
最新回應