新聞女王丨「中槍梁Sir」林景程演技大爆發！現實物理治療師參考中風個案研究肌肉協調

2023-12-22 15:30

新聞女王丨林景程演「中槍梁Sir」演技大爆發！現實物理治療師參考中風個案研究肌肉協調

佘詩曼、馬國明主演的TVB台慶劇《新聞女王》將於今晚冬至（22日）8時35分，播出一連兩集大結局，一班台前幕後將會移師澳門齊齊睇大結局。

【點擊睇《新聞女王》林景程】：

林景程現實其實有物理治療師牌照！

林景程為追夢入行。

去年林景程在《下流上車族》表現獲激讚。

林景程首次跟鮑姐合作，既驚又喜。

林景程呢幕戲賺人熱淚，網民激讚戲好。

為追夢放棄高薪厚職好彩得太太體諒肯一齊捱。

林景程飾演的梁Sir奇蹟甦醒，令觀眾大嘆意想不到。

齋睇相，都感受到「梁Sir」講嘢係幾咁艱辛。

林景程單靠眼神都清晰表達咗憤怒。

為咗演繹極用力狀態，林景程谷到頸都紅。

面對「佐治」呢條問題，「梁Sir」露出一絲失落。

「佐治」播出「梁Sir」獨家訪問及當年未曝光賊王案現場片段，令「Man姐」形象即時插水。

「Man姐」玩失蹤逃避面對，神情滿是回憶與內疚…

譚俊彥呢吓眼神同手勢都好有型。

到底會點樣解決佐治帶嚟嘅問題？

呢段回憶戲，阿佘先是演繹出熱戀少女嘅狀態。

但一聽到子傑要離開香港，佢一秒變失望。

譚俊彥呢段戲亦演活咗佢違心嘅心理狀態。

阿佘開始堆積眼淚。

眼淚已經堆到臨界點。

真係喊得又稚氣又淒涼，叫人點忍心吖！

今晚林景程與阿佘將有一場重要對手戲。

《新聞女王》結局周高潮迭起，昨晚（21日）焦點劇情是當年在賊王案頭部中槍的警察梁偉強（林景程飾）原來並未死亡，更於十年後奇蹟地甦醒，「Man姐」文慧心因而被邀請前往警署助查。梁Sir甦醒雖然令Man姐終能釋懷，但同時亦成為「佐治」馬國明打擊Man姐最強武器，他先漠視梁Sir意願以連串引導性問題引導對方講出對Man姐不利的一句：「我行唔到，精神差，講唔到嘢」，再將Man姐當年在賊王事件中極具爭議性的一句說話：「記者唔應該介入現場，報導先至獨立客觀」在新聞時段播出，擺明帶領對Man姐不利風向。

對於梁Sir奇蹟「回歸」，不少網民大感驚喜，相關場口對於今年有份提名「飛躍男」的林景程更是一大挑戰！由於梁Sir腦部中槍兼昏迷多年，甦醒後不但狀態蒼老、活動能力近乎零，平時主力靠「眉頭眼額」表達自己之餘，只能應付簡單對答，並要費盡力氣才能逐個字「戥」出來。昨晚劇中梁Sir接受佐治訪問時，便因極度用力想表達自己導致頸都紅埋！

新聞女王丨林景程做足功課練說話

林景程受訪時坦言為了演得更有說服力，正式拍攝前做足功課，並為了掌握「說話節奏」在家一有空便反覆練習：「因為個角色需要講好多對白，好容易就會因為想快啲交代啲嘢而講快咗，所以一定要好狠心去投入角色，令到個角色講嘢時無論如何都要持續地慢同弱。」

身為物理治療師的林景程除事前做了不少資料搜集，更仔細到連肌肉協調也列入研究範圍：「主要參考番腦創傷或中風病人嘅個案，始終梁sir爆過頭又昏迷咗咁耐，應該有一個好大嘅痕迹，可能係癱啦又或者完全講唔到嘢。呢個角色講嘢要好lur、好費力，好似諗到隻字但因為嘴部肌肉協調唔到、要好大力谷個字出嚟。」

新聞女王丨林景程曾參加《超級巨聲》

林景程續指角色難度是不能Over：「喺肢體形體上基本上我冇乜戲可以做到，因為要郁唔到，唯有靠多啲面部表情、眼神同聲線去表達，呢個反而最難掌握，驚拿捏得唔好會變咗作狀。」林景程還感激佳導一再為他細心解讀角色及fine tune造型，令其更易入戲。現實中的林景程2006年畢業於香港理工大學物理治療系榮譽理學士學位，其後參加過新秀、《超級巨聲》等比賽，2009年簽約TVB，去年憑住《下流上車族》飾演鮑起靜的不孝子而受到關注。

梁Sir今晚將與Man姐有一場極重要場口，事緣梁Sir約Man姐飲茶，Man趁機真誠致歉之餘並遞上支票希望予以補償：「我一個錯誤決定搞成你咁樣。」梁Sir回應的一番話則淚點爆燈：「我約你唔係要賠償，我要接受現實，冇得怪人。我昏迷咗，但我知你成日探我，追唔番就向前望，我昏迷十年，你十年瞓唔著，計落都算打和。」

新聞女王丨「Man」與「梁Sir」今晚和解

談到相關場口，林景程直指對「Man姐」佘詩曼佩服得五體投地，除為幫助對方畀足戲外，更是對情緒掌握揮灑自如：「以我嘅程度係覺得拍喊戲係好難去hold個感情hold得好耐，但佘詩係hold得耐得嚟又好完美。呢場戲係拍咗我先，佘詩曼雖然只係鏡頭後幫手畀戲，但我一路講對白都一路見到佢含晒淚光、差唔多喊出嚟咁。咁我當時就即刻盡快做好自己嗰Part，等大家快啲轉機位拍佘詩曼，而佘詩曼正式演時佢嘅眼淚情緒比之前更加有、更加靚！我覺得真係好犀利，呢場戲佘詩曼係一take過，好開心同有幸可以同咁頂級嘅演員對到一場戲，見識到一個頂級演員係可以咁樣將個情緒去運用。」

新聞女王丨佘詩曼喊出新境界

另昨晚佘詩曼在劇中第N度晒喊功，劇情講述賊王事件發生後，「子傑」譚俊彥為免拖累阿Man假裝離開香港工作並提出分手，席間不斷忍痛鼓勵阿Man爭取良機努力向上；想裝作懂事成就男友但又不捨男友的阿Man，邊聽著子傑說話邊默默「堆積淚水」，每次換鏡頭都發現阿佘眼眶淚水量增加。最終因淚水堆得太滿，阿佘說到這句：「如果你影嗰啲相上唔到封面，你唔好返嚟呀！」淚水即如瀑布傾瀉而下，配以阿佘既委屈又哭得像個小孩的腔口，完全演活純真少女面對失戀的痛苦與狀態，亦喊出了忍淚新境界。

【其他文章】：

新聞女王丨冬至播結局破天荒有新安排監製解構黃宗澤閃現結局與佘詩曼有關

下流上車族｜林景程與鮑姐大吵惹負評本人母親患癌逝世14年未釋懷

林景程與拍拖12年女友簽紙結婚林秀怡再做兄弟怕嫁唔出

林景程棄高薪厚職老竇用棺材本助置業唔急做主角冇人睇仲衰

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ

關鍵字