星8卦｜「絕世」心急嫁「老公」被利用翻身後悔惟有扮低調

2023-12-22 11:30

自從同「老公」結婚之後，「絕世」過住比較隱蔽嘅生活，因為呢鋪計錯數非常無面。「絕世」自問同其他女人最唔同嘅地方，就係想勾引邊個都手到拿來，唯一一次同「正氣」拍戲，點用媚功都搞對方唔掂，後嚟知佢娶咗「南洋」，挫敗感就歷年都喺心底，所以成日喺人前人後都數「正氣」怪脾氣。

但有時真係一世精明，遇到「老公」係無諗過有結果，畢竟對方太有錢，兩個人又差唔多年紀，男人通常係搵妹妹仔開心嘛！最抵死係「老公」一出手「絕世」直頭諗都唔諗就去馬，咁啱當時「老公」生意有啲問題，安排自己同「絕世」約會俾相熟記者影到，然後扮無知咁公開，果然因為「絕世」嘅名氣令股價升咗好多，暫時嘅難關亦過到。

「老公」溝女無數，但從來唔知女人可以咁樣幫自己，於是好快就向「絕世」求婚，不過又強調自己向來低調，驚公開之後兩個人都成日俾人追住採訪，所以帶佢去個冇乜法律效力嘅地方註冊，「絕世」無為意太多，其實係「老公」諗住將來唔掂唔使分太多身家。結果「老公」並無因為結咗婚收斂，依然帶住啲廿零歲嘅𡃁妹周圍去，好彩「絕世」有乜大場面未見過，初時直頭當睇唔到，總之自己係正印，霸住個位話之你，但因為「老公」玩得太公開，怕俾人笑，所以都好少出嚟，費事引人話柄。