原來視咁的│郭柏妍新突破演綠茶婊丁丁盈盈似連體嬰錫唔停

2023-12-19 16:15

由徐正康夥拍新鮮人陳萍April擔任監製的新劇《妳不是她》，於聖誕夜（25日）起、逢周一至五晚8點半在翡翠台播映，主要演員包括丁子朗（丁丁）、馮盈盈及郭柏妍等。劇集是百分百純港式現代愛情小品，盈盈與丁丁首度升呢女一男一之作，2人為劇集瞓身拍攝。而郭柏妍首度突破清純框框，飾演bitchy味十足的「綠茶婊」。

丁子朗與馮盈盈在劇中有不上肉搏場面。

丁丁盈盈錫到停不了，事前已有心理準備。

丁子朗在劇中與馮盈盈飾演戀人，在早前播出的宣傳片中，馮盈盈與丁丁愛得相當甜蜜癡纏，不少鏡頭均如連體嬰般黐到實一實，其中一幕「愛的孭孭」，唯美畫面加上冧爆表情，讓人更期待他們在劇中互動。2人受訪時坦言是拍劇以來與拍檔最多親密接觸一次，馮盈盈說：「係入行以嚟最大挑戰，監製April有事先講明親熱戲有訊息，係想透過我哋嘅互動同交流帶出情侶嘅感覺，令觀眾感受到愛情嘅力量同火花。」丁丁則說：「呢套真係好多錫錫戲，因為係純愛情劇，會好深入咁講愛情，咁難免會描述到情侶間嘅親密行為，就好似一對情侶每日都會有親密行為咁。事前April怕我哋尷尬，拍攝親密戲前會預留多啲時間綵排，希望出嚟效果會好，令我哋拍得舒服啲同少啲壓力，好多謝監製佢哋。」

郭柏妍搵細佬練嗌交

　　至於郭柏妍以超熱褲造型、與林景程在床上親密攬攬之餘，更聲大夾惡向馮盈盈挑機，最終更在床上大打出手，相當有睇頭，談到與馮盈盈之戰，郭柏妍坦言是拍劇突破之一：「我同盈盈決戰咗一個晚上，我拍咁耐劇第一次咁樣同女仔打鬥。」

郭柏妍拋下港姐包袱飾演「綠茶婊」，令人期待。

郭柏妍與林景程在床上親密攬攬。

　第2大突破是飾演綠茶婊，郭柏妍更指自己是一口答應：「我估唔到監製會搵我做呢個角色，佢同我以往角色非常唔同，我覺得係幾好嘅嘗試，所以一口答應咗。」談到劇中某些場口要向人破口大罵，郭柏妍坦言有難度，皆因平時很少與人吵架，更笑言拍劇期間為投入角色辛苦了親弟：「我會有事冇事都搵啲嘢同佢鬧吓交，所以都要趁呢個機會同佢講聲對唔住。」第3大突破則是與景程的親密床戲。