獨家丨80歲仙杜拉被甄妮爆跌親後首開腔報平安 興奮晒情史激讚謝賢正人君子
2023-12-15 07:00 
「樂壇風紀」甄妮近日大爆移居加拿大30年，80歲「鬼馬歌后」仙杜拉(Sandra)跌親，兼傷勢唔輕！《星島頭條》千辛萬苦搵到當事人回應，Sandra以一貫鬼馬語氣報平安，聲大大之餘仲識得笑：「我就嚟好返㗎喇，多謝大家關心。」最後她不忘帶笑提醒大家：「唔好唔記得笑！」因為笑能醫百病，Sandra笑言腦裡只有美好回憶，包括曾被謝賢力追的樂事。採訪：方騫平 攝影：鄧國良
早前仙杜拉曾返港為《情牽煇黃經典演唱會》演出，老人家雖然步速較緩慢，但依然活力十足，勁精靈，唱起歌來寶刀未老。經理人MiMi透露，Sandra跌親只係小意外：「4周前，Sandra左腳跘右腳失平衡跌親，幸好有地氈墊住唔算太傷，只係肩胛位裂咗，側身瘀黑咗，送院後醫生話如能自動埋口，不用做手術，約6個月內康復，叮囑最好做啲運動，加速復元。」MiMi補充Sandra目前每月覆診一次，已好得七七八八，「只係傷患仍隱隱作痛，但佢有時曳唔肯做，要逼吓𠱁吓。」
嗲甄妮惹誤會
對於甄妮指Sandra傳來柔弱聲音令人擔憂，還叮囑住Vancouver嘅同行送上關心！MiMi即叫大家唔使擔心：「佢對甄妮係嗲啲嘅，老友嘛，而且佢仲係鬼馬小朋友，會同甄妮講：『我好慘呀！』而且通話時可能開始眼瞓變得模模糊糊，聲音柔弱咗，所以惹來誤會。其實除家傭外，仲有同屋住雷太會互相照顧，而我及好友Nelson經常過去。」Sandra亦語帶輕鬆親報平安：「多謝大家關心呀，係隻拖鞋曳曳呀，搞到我唔覺意跣倒跌親，𠵱家由醫生跟進緊，進展非常好，我就嚟好返㗎喇。多謝晒，唔好唔記得笑，哈哈！」
畀記者睇胸口
另外，Sandra在港時曾接受《星島頭條》訪問，強調現階段只想健康、冇煩惱，所以從來唔會睇負面新聞：「人與人之間為乜要互相憎恨？唔好打交，唔要打仗，感恩我會好快掉走煩惱，唔好嘥我時間諗。」2020年，Sandra證實左乳生cancer，當時她以樂觀心情面對：「醫生問我割咗後使唔使做義乳？我秒回『割埋另一邊免除後患！』所以我經常用國語同人講『我沒有空(胸)』。」Sandra更笑言，「瞓覺冇嘢壓住晒，手術後馬上掉晒胸圍，好記得汪明荃跟我講『唔緊要啦，壽包一個，有冇都睇唔到！』哈…佢好好玩，好錫我。」語畢Sandra搞笑地對本報記者說：「你要唔要睇吓我個胸口？好似眼眉咁。」更忍不住唱兩句「我一見你就笑…」相當自得其樂。癌病康復者的Sandra並冇三高，她堅持會唱到健康撐唔住，暫無意退休。
曾被「大粒佬」追
Sandra的過濾式記憶只會記取快樂事，她自豪地爆料：「我16歲開始已經有好多人追，直至𠵱家都有唔止一個老外追求者呀，哼！你估我冇呀，我哋喺街上相識，有個經常打嚟約我，但推佢兩次，對方應該放棄咗，我唔想自找麻煩，只想和平。」她自爆年輕時追佢嘅唔係醫生、律師，就係有錢嘅「大粒佬」：「佢哋唔想我拋頭露面，要求包養我，當中有個澳門已婚名人，但我唔想害到人及受害，我好愛錫生命。」Sandra直言男人追求女星，目標都係為上床，呢方面佢好清晰：「我好直有嗰句講嗰句，你估上咗床仲會要你咩？睬你都傻啦。」不過，她激讚追求者中以四哥(謝賢)最有風度：「雖然佢喺行動上曾暗示過(發生超友誼關係)，但被我拒絕後仍繼續追求，佢係正人君子，我好尊敬佢。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應