獨家丨陳漢娜自爆初期冇劇本靠感覺做表情沈殷怡拍《社內》獲Edan粉絲打氣

2023-12-09 07:00

陳漢娜（Hanna）和沈殷怡（Shirley）在ViuTV劇《社內相親》中演閨密，雖然首合作，但因有共同嗜好而極速friend咗。對於被讚演出到位兼微表情可愛，Hanna首爆在冇劇本下全靠感覺揣摩角色。講到跟Anson Lo拍劇後曾收惡意留言，Hanna澄清事後發現並非粉絲所為，甚至跟Shirley齊獲AL和Edan粉絲打氣。採訪：杜杜攝影：Stanley 髮型:Heitai Cheung(Hanna) 化妝:San Chan(Hanna) 服裝:ba&sh(Shirley)

Hanna和Shirley因為Pokémon和咖啡，好快變老友。

Hanna和Shirley早在大學時已有一面之緣，但真正認識是合作《社內》，然後因共同偶像而熟絡。Hanna答得認真：「我哋有好多共同興趣，譬如大家都鍾意Pokémon，又鍾意飲咖啡，而鍾意得Pokémon都係好人嚟。」Shirley好認同，「鍾意Pokémon嘅人都係善良，所以合作好安心。」

兩人最難忘一齊拍醉酒戲，因可以狂爆肚。

兩人演繹由細玩大的閨密「孫賀利」和「陳映書」。

Hanna和Shirley第1日開工，便要拍晒她們15集中的對手戲。

Shirley這次終於感受到拍劇由頭帶到尾的感覺。

Hanna睇韓版揣摩角色

Hanna分飾「孫美玲」及「孫賀利」，因為同真實性格相差好大，加上開拍初期未有原整劇本做準備，所以好緊張，唯有靠睇韓版搵感覺，「角色有種令人好溫暖又好可愛嘅感覺，希望盡量將呢個感覺帶畀觀眾。」講到劇中「父母」都讚她演出到位，Ben Sir最欣賞她的出色微表情，Hanna解釋未有太多設計，「嗰啲微表情，拍之前冇諗定點做，冇刻意度，只係埋到位，就攞返韓版角色畀我嘅感覺，直覺呢個女仔會係咁，所以我做出嚟同韓版都未必好似。」

Hanna最初好擔心演繹同自己相差很遠的「孫美玲」。

Hanna被戲中「爸爸」Ben Sir讚微表情出色。

講到跟AL和Edan合作，Hanna坦認最初有壓力，特別在街上被圍觀拍咀戲，「我都有問佢哋驚唔驚？大家咁愛你哋又望住你哋都會好緊張，所以大家都有壓力。」提到留言被罵「賤女人」，Hanna就澄清並非AL粉絲所為，「開頭都驚，𠵱家知佢哋都好支持我。」Shirley都讚Edan粉絲好窩心，「Hanna講完被鬧之後，『爵屎』好窩心message我話『希望唔好影響到你情緒，好期望睇你哋兩對CP，有人講咗唔好聽嘅說話就唔好理。』」