專欄｜難分高低 維拉阿仙奴和波格

英超第16輪有好戲上演，由阿士東維拉主場擺陣迎戰阿仙奴。維拉今季主場成績亮麗，跨季14仗主場連勝，上仗贏曼城1:0全取3分，戰術部署得宜，兩閘安斯干沙及盧卡斯迪治尼嘅防守壓至邊路，加上高位逼搶下，將曼城前線威脅減至最低，結果藍月全場只得艾寧夏蘭特嘅2次射門。

進攻方面，維拉憑住長傳分邊，利用邊路空間，打反擊相當奏效，翼鋒里安拜尼大熟大勇，入肉埋門屢見不鮮，更係喺曼城身上全取3分嘅入球功臣，相信球隊會喺今場沿用同樣戰術面對兵工廠。

客隊阿仙奴周中作客盧頓，以4:3僅勝對手，當中防守角球出現不少漏洞，加上守門員大衛拉耶亦有不少失誤，以致後防問題浮現。幸好，前鋒夏維斯似乎開始找到定位，於中路位置與加比爾捷西斯互有配合，以減少球隊對邊路嘅依賴，相信今場戰況會緊湊而膠着，小妹決定敲和波。佩芝

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ