名人雜誌丨周秀娜：咀到黃宗澤無感覺　負傷打餐死 一人演兩角 超高難度

周秀娜（娜姐）與黃宗澤（Bosco）曾於《戰毒》中有連場咀戲，兩人為TVB台慶劇《叠影狙擊》再度上演親熱咀戲，娜姐笑言咀到黃宗澤無感覺，不過有對方在片場可以做「紓緩」擔當。身為拍檔之一的黃浩然大讚娜姐夠膽接拍這個角色，一人演兩角已經好難，再加上角色本身的設定要扮另一個人，難上加難。撰文∣鄺芷瑩　攝影∣譚國良 髮型∣Heibie Mok@Artify Lab(周秀娜)、 Dy@WABI HAIR(黃浩然)、 Nicki Ting@Hair Corner(胡卓希)、Lupus@orient4(朱鑑然)化妝∣Circle Cheung(ndnco.co)(周秀娜)、Jenny Shih(黃浩然)、Zoey Chin(胡卓希)、Jenny Shih(朱鑑然)服裝∣Moschino(Bluebell Hong Kong)(周秀娜)、CLOT(黃浩然)、UNNORM IS DEAD @RUNWAY WORKSHOP LIMITED(朱鑑然)

胡卓希、黃浩然、周秀娜與朱鑑然四位型人，在《叠影追擊》一劇中合作愉快。

由「金牌監製」梁家樹及謝穎擔任總監製的TVB台慶劇《叠影狙擊》，當中有黃宗澤（Bosco）、周秀娜（娜姐）、黃浩然、朱鑑然、郭政鴻及胡卓希等演出，故事講述新加坡特警隊長魏曉晨（周秀娜飾）查案時意外發現雙胞胎妹妹梁曦（周秀娜飾）的屍體被活摘心臟。為追查胞妹枉死真相，魏曉晨借用梁曦的身份暗中調查圍繞其身邊的可疑人物，連番追查後發現案中有案，逐步揭示不可告人秘密。

娜姐今次一人分飾兩個角色， 她直言有點拍到精神分裂。

演到精神分裂

今次擔任女主角一人分演兩角雙胞胎姊妹的周秀娜，笑言最令她精神分裂在面對不同的人處理關係方面，皆因戲中姐姐的角色是特警，妹妹則是保險從業員。她說：「故事開始時已經講述妹妹因意外過世，而姐姐係一位警察嚟香港就係查呢件案嘅真相，所以由頭到尾係姐姐扮阿妹居多。」戲中飾演警察的娜姐，有不少打鬥戲，就連拍檔黃宗澤也曾透露劇中有七成的打戲都由周秀娜負責，對方比自己更打得。周秀娜笑謂：「最好打唔知點解係女仔？啲男仔好少動作戲，所以我同佢哋開工就好開心，因為知道無乜動作戲，文戲居多啦！」

娜姐與黃宗澤合作無間， 所以拍咀戲也一點不尷尬。

周秀娜一向讓人感覺是弱質纖纖的女生，但今次演繹十分打得的女警，令人眼前一亮。雖然有不少動作戲，但她未呻辛苦，反而覺得拍攝時面對蚊蟲更為難受。她說：「我哋喺荒置嘅地方拍攝，好多蚊蟲、又好污糟，加上拍打戲時候係四、五月，天氣很熱，當時着晒長袖恤衫、皮褲同皮褸，周身大汗又黐住啲衫，個頭都濕晒！可能拍完打戲之後，下一場又要好靚出現。因為我一人演兩角，要盡快去化番個靚妝出現，呢度係有少少精神分裂！」

劇中娜姐痛失妹妹， 有不少內心戲發揮。

劇組嘅娛樂擔當

過往周秀娜參演過不少電影，雖則演出過動作戲，不過她笑言在《叠影狙擊》是她從影以來是最多動作戲的作品，戲中除了有槍戰戲份外，以一個打十個，而且有攀爬動作。她笑謂：「好多場面一個打兩人，又一拳好勁咁打低人。」周秀娜坦言劇中的危險動作自己未必做得到，需用替身幫忙拍攝，反而演出該劇最用心力的是演繹親情、友情的戲份，令她最大壓力。

劇中有不少動作場面，都由娜姐負責， 但她卻無意做打女。

繼《戰毒》、《非凡三俠》後，今次是周秀娜跟黃宗澤（Bosco）第三度合作，當中有床戲及親嘴戲，周秀娜笑言跟對方咀到無感覺，不過她解釋一人演兩姊妹角色，講述戲中所演的妹妹跟黃宗澤是情侶關係，以家姐身份時會覺得對方是妹妹的男友，所以會好抗拒對方。她說：「戲中我無接收佢呢個男朋友，我一直對佢係純粹為咗用佢警察身份嘅資源。不過跟Bosco再次合作更加有默契，之前同佢合作過兩次，今次同佢對戲，無論以姐姐、妹妹角色，我都會好放心！佢會好清晰，同埋大家都知佢係小朋友嚟嘛！我做呢個角色要好專注，喺片場時唔會太輕鬆，好多嘢諗， 要諗吓點去演？自己會比較靜，有佢喺度會紓緩到，佢係娛樂嘅擔當，是現場的康樂組。」

黃浩然與娜姐有不少對手戲，二人擦出不少火花。

未想做打女

周秀娜在戲中有不少打戲，開拍前花了不少時間練習，練習期間不慎傷及肋骨，當開拍時好多打戲要着高跟鞋，其中一場戲最令她深刻印象是在中環封街拍攝跟黃宗澤演追車戲。她說：「我哋係人追車，着住高跟鞋去追， 好彩我無仆低，哈哈！」談到她今次有多場動作場面，問到可想在打女方向發展？她笑謂：「無咁嘅打算！其實今次唔係動作戲先接，因為睇到個故事，自己好鍾意，被個劇本吸引，係好大挑戰。一個人帶出咁多人物，中間穿插不同情節，最終結局個妹妹角色想做乜？呢啲都好吸引。」

娜姐演兩姐妹，因為妹妹去世，她假扮對方查出死因。

浩然唔敢畀分數

劇中擔任利民行政CEO的黃浩然，可謂是全劇最舒服的角色，因心臟有事全無打戲。今次是黃浩然跟周秀娜第二次合作，黃浩然指跟對方更加有默契，溝通上容易，周秀娜的角色比較複雜，所以拍攝前兩人會研究吓如何拿捏同演繹。他說：「唔好話娜姐有無進步？呢部戲係一個好複雜嘅角色，敢接嘅女演員已經好勁！首先一人演兩角已經好難，仲要牽涉咁多人物喺戲裏面，我哋演員做功課時對你有一個感情，對娜姐、朱鑑然亦有一份感情，每個人都好唔同，普通人已經好難，再加上角色本身個設定要扮另一個人，咁就難上加難！佢都敢接，而且仲有好多動作戲。我覺得幾多分唔係自己去講，係要觀眾感受，起碼我覺得誠意已經係超出晒所有嘢。」

黃浩然劇中與娜姐也有感情線發展。

胡卓希很勤力

本身是模特兒的胡卓希，近年參與不少幕前演出，戲中飾演黃浩然的忠心下屬的他，笑言自己的打戲全程跟娜姐在眼神交流，因為今次的角色的前設將黃浩然視為親生哥哥看待，好擔心親近對方的人，所以對周秀娜有好大敵意。他說： 「觀眾可能覺得我愛呢個大佬！今次係我跟黃浩然第三次合作，每次我好彩可以喺側邊一齊討論劇情同角色，大家好有默契點樣研究而做到大家想要嘅關係，我好放心又緊張，因為知道浩然要求高，但好安心，佢擺咗自己個擔心落去，要handle 好多人。」

朱鑑然演一名黑客高手，有很大挑戰。

朱鑑然戲中飾演精通網絡的頂級黑客，經常幫忙周秀娜飾演的魏曉晨利用電腦探查可疑人物或有關妹妹死亡的蛛絲馬跡。為了今次角色，朱鑑然表示學習了關於電腦的專有名詞，雖然其他角色人物好認真處理事情，但他的角色反而好跳脫輕鬆。他說：「呢個角色去到尾段有好大變化，演出係好大挑戰，佢會遇到意外。」

胡卓希演對大佬忠心不二的手下，既緊張又安心。

梁家樹欣賞娜姐夠硬淨

身為《叠影狙擊》總監製之一的梁家樹，對於多位演員的表現也讚不絕口，他透露今次找來周秀娜擔演， 當中有不少原因，其中黃宗澤跟好多女演員合作大多那些元素，反而會估不到周秀娜在電視劇出現，務求會有新火花出來。他說：「周秀娜未開拍前練習已經不慎傷及肋骨，到開工都未完全康復，都會少少痛！之前拍動作戲都會就住佢，但佢戲份又多，所以好辛苦，付出好多時間同努力。當時疫情期間拍攝，真係好彩！ 佢又無事，佢嗰種堅持我佩服佢。」當年在TVB時經已跟跟黃浩然和黃宗澤合作無間，今次再度合作，梁家樹形容黃宗澤風采依然，為人調皮與人容易相處，是一位好用心的演員，又指黃浩然拍攝時會提出意見，每場戲也會詢問如何演繹，希望出來效果更好，是一位很勤力的演員。

監製梁家樹期待劇中演員姐合有新的化學作用。

 

《星島頭條》新網站有更多精彩內容：http://www.stheadline.com/