獨家丨周秀娜直認跟黃浩然拍親熱戲超興奮 同黃宗澤拍《叠影》床戲熟到瞓住吹水

繼去年合作劇集《黑金風暴》後，周秀娜跟黃浩然再於新劇《叠影狙擊》中合作。前者分演孿生姐妹，周旋於浩然及黃宗澤之間，當然亦有親熱戲，娜姐表示由於跟兩人太熟，同黃宗澤拍床戲時喺張床吹水，至於跟浩然拍攬錫戲，仲唔怕激嬲對方老婆，笑言：「見到佢就超興奮」。採訪：杜杜 攝影：Stanley 髮型:Heibie Mok@Artify Lab(周)、Dy@WABI HAIR(黃) 化妝:Circle Cheung(ndnco.co)(周)、Jenny Shih(黃) 裝:Moschino(Bluebell Hong Kong)(周)、CLOT(黃) 場地:Fridge

娜姐同浩然第2度合作，因為好Friend，拍親熱戲完全零尷尬。

恨演反派好耐的浩然，今次角色複雜相當好玩。

娜姐飾演的家姐是新加坡特警隊長「魏曉晨」，妹妹就是保險公司職員「梁曦」，為查明妹妹發生意外原因，家姐向浩然飾演的集團CEO「塗文諾」埋首搵證據，「每個人我都懷疑，覺得有機會係兇手，加上唔認識嗰啲人，所以對住佢哋唔可以表露太多，講嘅嘢唔係真實字面意思，可能表達緊另一樣嘢，尤其對住佢（浩然）嘅時候。」

娜姐今次分飾兩角有一定難度，但可以過足戲癮。

新加坡特警隊長「魏曉晨」 ，未能接受孿生妹妹「梁曦」死訊。

浩然開心觀眾有驚喜

浩然覺得跟娜姐的角色互相猜忌之餘，仲有感情成份，令演繹這個奸角複雜又好玩，「好似叫佢幫我做唔好嘅嘢，但實際上係鍾意呢個人，我接到呢個角色就諗，佢做咁多壞事，希望畀觀眾睇到佢嘅目的，會動真情，係有理由去做啲唔好嘅嘢，譬如佢對娜姐表白，對佢好，咁樣觀眾睇到唔會覺得好表面。睇返網民意見都話OK，都幾喜歡，覺得有啲驚喜，同一般嘅反派唔同。」

「塗文諾」表面上是個殷實商人，實則壞事做盡。

劇中浩然跟黃宗澤對立，有不少對手戲。

戲中浩然和娜姐有親密戲，浩然爆娜姐料：「佢嗰日好開心呀！」娜姐狂笑點頭：「我好開心呀！因為拍完就收，哈哈！見到佢就超興奮。」原來娜姐因為煞科而興奮，浩然笑言：「佢好期待呢場情感戲發生，終於可以飛甩呢個角色。」至於娜姐第3度與黃宗澤合作，對方演妹妹的男友、香港重案組高級督察「袁晟傑」，娜姐覺得兩人拍感情戲時，完全有老夫老妻感覺，「好熟悉，好放心，大家好有默契，最好笑係我哋拍親熱戲拍得最快，哈哈！因為大家已經熟到，毫不尷尬。」浩然搞笑插嘴，「得啦，嗱嗱聲，收工呀！」娜姐再補充，「我們可以等打燈時，喺張牀度傾吓時事，哈哈！」

劇中娜姐主動埋浩然身，希望查明妹妹意外死亡真相。

娜姐跟黃宗澤有不少床戲，由於太熟而拍得特別快。

娜姐常受傷買重保險

分飾兩角的娜姐覺得演繹上最難，是面對不同角色關係時，兩姐妹處理態度會不同，「如面對阿妹男朋友（黃宗澤演），我唔係佢女朋友嘛！身體上每次俾佢掂或者錫係好抗拒，因為純粹只係想佢幫我查啲嘢啫！」另一樣困難是大量動作場面，娜姐覺得記招式最頭痛，「拍動作戲來來去去都係嗰啲招式，最重要反而係流暢度，冇理由打完一吓，唔記得咗下一個動作，停咗喺度，特警平時係做開呢樣嘢，唔可以唔熟。」不幸地娜姐因盡力練習，搞到未開拍已受傷，「開頭叫我撻人，我比較驚，其實武師做咗咁多年，根本冇嘢，咁不如我試吓畀人撻，就知道係冇事，咁樣就出事嘞！」最終她的一小節肋骨裂了，所以開拍初期先拍文戲，但後期才拍動作戲一樣觸傷舊患，搞到膝蓋紅腫。問娜姐拍戲經常受傷會否買重保險？她笑指，「咁呢啲新聞唔好出住，等我買咗保險先，哈哈！」

娜姐開拍前苦練動作搞到受傷，肋骨裂了。

娜姐希望動作場面可親身上陣，唔想吓吓遮住塊面。

劇中家姐為妹妹追查真相，犧牲好大，問娜姐現實會否為家人咁做？她笑言：「希望現實中唔會有呢啲嘢發生，千萬唔好有呢啲掙扎位！」另外，娜姐亦跟角色一樣重視親情，「屋企人係最重要，做乜嘢都係因為有佢哋喺背後支持。」

娜姐由於壓力大拍到暴瘦，拍完即狂去旅行放鬆。

 

 《星島頭條》新網站有更多精彩內容：http://www.stheadline.com/