星8卦｜「姣精」冧掂「一號」以為享福衰貪心一鋪過自斷米路

2023-11-21 11:00

女人最忌係乜？貪心囉！「姣精」一向都好叻搵老細，咁多年身家豐厚，唔覺意咁同其中一位生咗個仔，但「老闆」話費事麻煩，畀咗筆錢佢仔乸都唔要。而呢個仔成20歲至公開人前，大家都好詫異，老竇係邊個，連阿仔自己都唔知，因為當初兩個人簽咗保密協議。

不過講經典，「姣精」最成功就搞掂「一號」，以為自己從此一世無憂。相好過幾次之後，「姣精」用盡一生功力，諗住綁實呢隻金蛋。不過，每次交易「一號」都好小心，怕留手尾，更驚俾人知，但又真係好冧「姣精」，次次畀現金乾手淨腳。但「姣精」嫌麻煩，就同「一號」話已經咁熟就唔使擔心。「一號」亦想試下佢到底係咪可以長久發展吓，於是留底咗一張無寫銀碼嘅支票，睇吓佢會點樣處理。

結果「姣精」以為自己執到，諗都唔諗就填咗差唔多成千萬落去，仲鬼咁興奮即刻去銀行入數。由於銀碼太大，銀行梗係唔敢隨便入票，打電話畀「一號」嘅助手，對方早就預咗，所以叫銀行過咗條數嘅十分一畀「姣精」，從此亦自斷米路，如果唔係，今日女首富都有得佢做啦！