獨家丨程人富拍Mike導《無制限》：試過一鑊夠皮啦 同FINALLY演舞台劇賀小薯茄7周年

程人富（程仁富）、阿J（關浩傑）、肥蚊（姚澤汶）和朱Mic（朱柏熹）在小薯茄中演出《FINALLY嚟喇》環節，繼而組成男團「FINALLY」兼推出首支單曲《終於出歌》，最近更宣佈12月舉行舞台劇《FINALLY OK》，更搵來Haters組識「反NALLY」首領阿冰做嘉賓助銷飛。人富講到以Anchor man身份拍《無制限探險隊》，他坦認同 Mike導合作過已夠皮，但唔排除將來拉埋FINALLY再合作盡情玩。採訪：杜杜 髮型:Oscar Ngai化妝:Hulda Tsai 服裝:Rickyy Wong

FINALLY為舞台劇事前做足準備，除上導演陳小東特別準備的喜劇workshop惡補。

FINALLY為舞台劇事前做足準備，除上導演陳小東特別準備的喜劇workshop惡補。

第一隊長人富話舊年6周年騷，由於FINALLY太受歡迎，決定今年7周4子再演舞台劇，「真心講舊年FINALLY嗰part，被公認最好反應，我同阿J除衫嗰part，都唔夠呢part掌聲嚟，我哋4個耳仔就係證據，聽到好大聲掌聲，咁唔得嘞！再咁落去我哋就會喧賓奪主搶晒小薯茄風頭，索性自己搞一個騷，趁住7周年搞個齋FINALLY，同埋阿冰（吳冰）嘅舞台劇，畀大家睇吓我哋除咗唱歌公認好聽外，做戲亦都好睇。」

去年小薯茄6周年，FINALLY聲稱演出獲最多掌聲。

人富和阿J去年除衫演出，都不敵FINALLY受歡迎。

阿冰做嘉賓有助票房

小薯茄女成員中，為何只選阿冰做嘉賓呢？人富就好老實話，「為咗票房嘅方向，哈哈！」之後他再認真解釋，「你估我唔想揀晒佢哋3個咩？！但係佢哋都忙，麗英（鄧麗英）有個人演唱會，童童（蔡曉童）有個劇，佢哋要參與就要𠵱家開始埋位排，但佢哋都唔得閒。」他們都有想過全男班演出，甚至男扮女裝，但都覺得唔可行，第二隊長阿Ｊ解釋：「有個女仔同我哋一齊排戲，係會開心啲嘅。」第三隊長肥蚊都認同，「當剛陽味太重，會好火爆。」人富講出終極原因，「演出好辛苦，但有阿冰喺度我哋願意，我估啲觀眾都願意好多，真心嘅，我哋FINALLY有好多Haters，自稱為『反NALLY』呢個組織就係以阿冰、麗英同童童為首，我哋想阿冰嚟，帶多啲佢哋啲『反NALLY』嚟反我哋，炒熱個氣氛囉！」

FINALLY決定搵阿冰做嘉賓，貪其對票房有直接幫助。

FINALLY都想搵埋麗英和童童參與舞台劇，可惜兩人要忙其他工作。

肥蚊指個騷內容會貫徹主題「FINALLY OK」，唔會雜亂無章做個劇，還會分多個場景和角色去演出，「源自《FINALLY嚟喇》嘅精神同理念，我哋會去挑戰一啲人哋覺得我哋唔會做到嘅嘢，最顯而易見就係我哋4個做男團呢件事，所以係 FINALLY OK，最衰就係我哋靚仔，縱使唱歌跳舞未係去到最top，但係我哋都係男團，呢個劇我哋會有唔同場景，但每個都畀到觀眾『FINALLY OK』呢個感覺。」由於未正式綵排，所以暫時他們都未知扮演角色，阿J話：「可能會幾天馬行空，好抽象，譬如會扮督屎！」人富笑謂：「好玩唔玩去玩屎，男團都去做屎！哈哈！」

FINALLY首次開9場騷怕體力不支，已開始節食兼做運動。

當正林峯錄歌出晒事

比起玩屎，人富最近做Anchor man的ViuTV節目《無制限探險隊》，在非洲拍攝時直情係玩埋命，他搖晒頭話：「好彩返到嚟，好彩死唔去，可以返嚟開騷，返嚟玩屎！」問到仲想唔想同咁癲的Mike導再合作？人富反應好大話：「Mike導呀！唔敢啦！試過一鑊都夠皮啦！」係咪覺得懶懶哋嘢？他就否認：「最危險其實佢自己頂晒㗎啦，佢都算唔話得，但係再嚟多鑊呢？我知佢作風係鍾意新鮮感，佢可能要試吓啲其他嘢，或者同唔同嘅人合作過後，我哋先至再jam埋一齊囉！」他覺得將來帶埋FINALLY 兄弟一齊拍都冇問題，「如果Mike導加我哋4個，應該係話無制限團隊加我哋4個嘅話，會幾好玩，我哋4個又夠抵死，佢哋又可以盡情諗啲嘢嚟玩我哋。」至於去邊度拍好呢？他就話：「都真係要度吓，我哋4個可以一齊去啲咩地方。」肥蚊竟提議，「潮州囉！哈哈！」

人富在《無制限》與Marco（葉振弘））齊做Anchor man。

人富在《無制限》夾在Mike導前面餵野生鬣狗，幸好有驚無險。

人富讚Mike導唔話得，最危險鏡頭都親身上陣，仲搞到中埋槍。

FINALLY 最近推出首支單曲《終於出歌》，正式以歌手資態出道，人富突然變得好謙虛戴晒頭盔話：「唱歌對我哋嚟講係表演嚟，我哋唔會話𠵱家係個專業歌手，驚侮辱咗其他歌手，平心而論，我哋唱功都有排進步。」原來他們有專登搵老師學唱歌，依然未見明顯進步，所以人富有感而發，「盡咗力都係咁，本身個底唔夠好，短期內唔會變好聽好多，所以錄歌都係希望好玩為主，希望大家聽我哋唱歌，會好似睇緊我哋啲片咁樣感覺。」朱Mic話首歌錄了兩日，第一日好認真，個個當自己林峯咁唱，反而出晒事，「以為自己可以唱到好似《愛在記憶中找你》（林峯名曲）咁好聽嗰吓死嘛，一嚟唔好玩，二嚟唔好聽。」人富笑指：「得個樣似！」朱Mic反對話：「唔係個樣，係得個表情似咋！」肥蚊笑指音樂總監早估到他們唱歌水準，「佢好淡定，應該係預視到我哋唔係技巧取勝，用返我哋精神，夠好玩就得。」朱Mic直言巿場上，好難搵到他們這種package的男團，人富認清事實指，「少係因為唔work，呢啲package會餓食！哈哈！」

FINALLY最近推出首支單曲《終於出歌》。

FINALLY開心為尹光演唱會任嘉賓，首次踏上紅館舞台。

《星島頭條》新網站有更多精彩內容：http://www.stheadline.com/