獨家丨蔡繼光導演爆陳百強曾因潔癖拒拍揭43年前拍攝《喝采》秘聞

2023-11-17 08:00

陳百強（Danny）、張國榮（Leslie）、鍾保羅和翁靜晶主演的青春片《喝采》，相隔43年，最近以4K數碼修復版再度公映，導演蔡繼光接受《頭條日報》專訪時，大談當年拍攝點滴。蔡導指 Danny因為唔願拍玩爽身粉戲份而拒絕開工，而翁靜晶則憑住西洋氣質揮低周秀蘭成為女主角。採訪：杜杜

蔡導有10多年冇睇過《喝采》，重看百感交雜。

蔡導跟翁靜晶多年冇見，難得在首映禮聚舊。

戲中有場講述Danny仔18歲生日，盧業媚等同學送上爽身粉作禮物，最後更玩互灑，雖然戲份簡單，但Danny唔肯拍，「因為佢有潔癖，話咁污糟唔拍，佢試過喺藝術中心拍追的士戲，都唔肯去嗰度嘅廁所，要返伊利莎伯大廈嘅屋企先肯去。」由於當時電影開拍無耐，蔡導怕往後失控，一度要脅Danny唔拍就換角，「年青演員都係睇佢頭，佢作反咁點搞，我咪話『你唔拍就走，但唔好再返嚟，我再搵人拍』。」Danny即打電話向當時經理人譚國基求救，「譚國基叫佢『你千祈唔好走，快啲返去拍戲啦』。」蔡導讚Danny專業，有不滿但埋位睇唔出，「佢返嚟拍，拍得好開心好投入。」

有潔癖的Danny唔願去藝術中心的廁所。

戲中盧業媚等同學跟Danny大玩爽身粉戰。

蔡導最難忘結尾歌唱比賽戲份，除有臨時演員飾演觀眾，還有大量Danny粉絲。

翁靜晶揮低周秀蘭做主角

談到女主角揀了當時只有15歲的翁靜晶，蔡導稱當年陳欣健帶了兩個女孩跟他見面選角，「一個係翁靜晶，另一個就係周秀蘭，揀翁靜晶係因為感覺西化啲，同套戲個氣氛比較夾，亦都襯Danny，同埋佢開放啲，可以嘗試唔同嘅嘢，周秀蘭係傳統香港乖女仔嘅形象，唔係太啱呢套戲。」當年翁靜晶雖然年紀輕，但在蔡導眼中一點也不似15歲，「可能佢家庭背景，好少見爸爸，媽媽又好惡，平時得佢同細佬，佢係好獨立好成熟。」而蔡導之後執導張國榮主演的《檸檬可樂》，最終選了周秀蘭任女主角，「想佢同Leslie有個對比，Leslie好西化，佢就傳統啲。」