獨家丨寶珮如爆《白日》精彩刪剪劇情同「院長」有路 無奈被Cut戲難忘喊住獻身

獲金馬獎5項提名的《白日之下》上映兩周票房收近500萬，觀眾大讚戲中所有演員演技出色，包括59歲飾演惡毒看護的寶珮如（Baby）。她接受《頭條日報》專訪時首公開刪剪劇情，她飾演的「芳姐」原來跟林保怡演的「章院長」有段情，做事麻木不仁全為院長，被刪戲份相當精彩，Baby言談間好無奈但明白導演用意。同時又開心提到，買生果遇到《白日》粉，仲用佢嘅戲中對白回應返佢，𠱁得Baby好開心。採訪：杜杜 攝影：羅安強 場地:Studio Meta

Baby對於喜愛戲份被刪覺得好可惜，但能夠參與好作品，已覺得好感恩。

Baby對於喜愛戲份被刪覺得好可惜，但能夠參與好作品，已覺得好感恩。

因母親患有認知障礙症，Baby因工作關係要安排媽媽住護老院，所以好了解看護工作情況，「係好煩厭嘅工作，點解要綁住老人家？方便佢哋做嘢快啲，我媽媽都被綁過，因為佢周圍走驚走失。」當《白日》監製爾冬陞親自搵她演「芳姐」時，她睇劇本已覺得角色好有發揮，更驚爆同保怡的非一般關係，「做衰人，但內心唔係咁差，係為咗愛，呢個看護同保怡有段情，其實我係為佢。」

Baby車禍後頭10年日子好難過，但往後14年卻過得很幸福。

開心對白觀眾入晒腦

原來「芳姐」麻木不仁，全為了院長「章劍華」，在刪剪戲份中，Baby跟飾演看護「何姑娘」的龔慈恩有場對手戲，「龔姐叫我『你唔好再為呢個男人做嘢啦』，我同佢講『我唔需要呢個男人為我報恩，我係甘心情願為佢』。」Baby跟保怡的感情戲被完全刪剪，當中最令Baby難忘的場口，是跟保怡的爆喊獻身戲，「我想佢開心，獻身畀佢發洩，佢推開我趕我走。」被拒後的「芳姐」喊住質問 「院長」，為何要「小鈴」（智障院友）都不要她，「我話『我為你做咗咁多嘢，由邊度開始跟到你嚟呢間安老院』，嗰段戲我好鍾意，一路喊住講。」

「芳姐」跟「院長」本來有感情戲，好想睇呀。

Baby在《白日》虐待周漢寧，直接用釘書機釘落手，原來有豬皮包住。

喜愛戲份被刪剪，Baby好無奈，但亦理解導演用意，「人生就係好矛盾，我有諗返呢段戲，如果有埋大家會覺得我未必咁衰，唔會focus喺射水、打人嗰啲情景，cut咗就會focus返，全套戲喺安老院發生，唔要有支線，淨係見到個惡姑娘、衰嘅姑娘。」雖然戲份不多，Baby演出仍獲激讚，上映3日去買生果已有驚喜，「我揀緊車厘子，問後生老闆，盒底嗰啲唔知靚唔靚？佢就望住我話『一係食一係唔食』，佢講句對白因為認到我，幾得意佢入咗腦，原來佢同幾個sales都睇咗，話『你做得好正呀！寶小姐』，呢個係第一個親自收到嘅反應。」

「芳姐」對院友態度惡劣，在天台向着他們射水一幕最震憾。

繼《藍天白雲》後，Baby再跟梁雍婷合作，大讚她夠專業。

向林保怡搲撈再合作

除了獲讚，能跟欣賞已久的林保怡首合作，亦令Baby好享受，「對戲時佢攞咗我個劇本掉開，佢話『唔好睇，唔好限住嗰樣嘢』我即刻窒一窒，以為佢好惡，對完戲佢話『我哋猜枚，你飲唔飲酒㗎？玩吓囉』佢諗到我緊張，想我放鬆，我真係同佢猜枚，好聽話，融合咗『芳姐』對佢嘅愛，佢要乜我提供乜，佢幫到我。」由於合作太過愉快，Baby更鮮有主動搲撈，「我知佢有做導演、監製、寫劇本，我自薦話『好想再同你拍，你有咩啱一定要搵我』」

1999年一場車禍，令Baby嚴重毁容，人生出現大逆轉。

2011年，Baby跟拍拖兩個月的圈外人鄧秋雄（Matthew）結婚。 （8）

訪問當日是11月11日，正值Baby發生嚴重車禍24周年，「以前我好驕傲，因為太細個好容易得到一啲嘢，入行有個好好嘅經理人周梁淑怡，冇讀過訓練班就做主角，同好多大星做節目，冇做過路人甲乙丙，完全冇捱過，就係一個車禍，所有嘢停晒、冇晒，反思以前有嘢食都話唔食要減肥，嗰時真係好衰格，所以我冇撞車，可能停留喺嗰個階段。」Baby認為現在的出色演技，全靠這些經歷提供養份，「早幾日食慰勞宴，見到爾生（爾冬陞），譚玉瑛姐姐坐我隔籬，佢問我哋兩個，唔係話我哋老，佢問『係咪上咗年紀，個戲越嚟越好』，我答佢『唔係戲越嚟越好，係我哋人生經驗豐富咗』。」

1988年入行不久的Baby，已有機會跟林建明合作主持節目。

Baby跟譚玉瑛出席電影慰勞宴，被爾冬陞問年齡跟演技關係。

對於會否繼《藍天白雲》後，再有電影獎項提名，Baby完全冇信心，「呢個戲個個都咁好，佢哋實至名歸，我仲未行到嗰步，已經好感恩做咁惡死嘅看護，被人認同我做到惡女人，已經攞咗獎啦！」明年便登六的Baby，不但不言休，還希望繼續有進步，「好想演『老雞』（老妓女）、企街嗰啲，我未演過，呢啲戲好難演，我又好想演吸毒者，鼻涕口水流嗰啲，可能人生經驗複雜咗，想演啲複雜啲嘅戲。」

2018年，Baby首度憑電影《藍天白雲》獲提名金像獎最佳女配角。

 

《星島頭條》新網站有更多精彩內容：http://www.stheadline.com/