古天后日誌｜ 美國息口確認見頂 料利好後市發展

11月15日，大致多雲，早上稍涼，日間部份時間有陽光，天氣乾燥。隔晚美國10月份CPI為3.2%，較預期的3.3%低，核心通脹則為4%，亦低於預期嘅4.1%，10年期債息跌穿4.5厘，利率期貨反映聯儲局加息周期已結束，明年底前更有機會減息近1厘。美股周二大幅爆升，道指曾飆近600點，收市升489點；標指跟納指分別升84點及326點，走出調整區，帶動港股ADR及夜期急升逾400點。

美國10年債息回落至4.44%，雖未跌至4%水平，但科技股已按奈不住，納指升2.37%。美股再大炒減息，當明年真正減息開始，估計美股已經有能力再創新高。雖然目前仍未達美儲儲局通脹目標2%，但CPI接近3%，聯儲局非但無條件再加息，更需考慮何時減息，市場聰明錢都係牆頭草，早兩日鮑爺放鷹又話仲要加多次息，噚晚出完個CPI，市場已轉晒風向，又吹水說明年7月要一次過減息0.5%。

傳內地推萬億融資救樓市

美國息口見頂應無懸念。之後都無乜可能再加息，美匯急跌至104，熱錢又再湧入新興市場搵食，人仔離岸價反彈上7.26水平，估計印度、南韓會較受惠，中國仍受外資徹出影響，估計外貿復甦緩慢。咁嘅情況下阿爺再放水。尋日黃昏再有消息指人行將提供1萬億元人仔支持「三大工程」，利於穩定樓市及經濟，夜期即見反應重上17,500點水平，復加美國公布CPI利好，夜期及ADR進一步抽升400點，升至17,800點水平。預期今日恒指裂口高開，挑戰近月下降軌通道頂部，約17,900點水平，若能突破可試上周高位18,039點，相反挑戰不果回調作整固，支持位大約係17,700點及尋日高位17,565點，企晒全部平均線之上，好友要喺今年餘下時間反擊，就係靠呢鋪。能夠守晒全部移動平均線，有條件進一步向上挑戰100日線，以及由1月延伸至今大型下降軌頂部19,000點水平。只不過係港股資金面仍弱下，呢個月上唔上得到去19,000點都係一個疑問。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ