獨家丨盧慶輝自揭當年撻著梅姐真相勁尷尬公開唔識老秘訣澄清未夠55歲

2023-11-15 07:00

已移居內地的盧慶輝（Marco）憑客串TVB劇集《香港人在北京》翻Hit，觀眾大讚年過50的Marco好有型，仲話好掛住《真情》的靚仔醫生「唐立生」。淡出娛圈十多年的Marco好好傾，講起曾跟張國榮合作非常興奮，提到被讚保養得宜又笑唔停，更公開Keep Young秘訣，甚至問到當年突然唔撈，更自爆真相，原來跟已故天后梅艷芳有關。採訪：方騫平

中佬型男盧慶輝唔願透露真實年齡，只強調少於55歲。

到底真實年紀係幾多？盧慶輝話要保密。

盧慶輝北上發展從商傳身家逾億。

盧慶輝𠵱家主力從商，在北京及廣東省都有製造業、食品、蔬菜及房地產生意。

在《香港人在北京》中盧慶輝飾演霸氣CEO，惡鬥「視帝」陳展鵬，演得七情上面，觀眾係咁畀Like。Marco多謝香港觀眾冇忘記佢，至於會否乘勢再拍港劇？Marco直言對演戲仲有興趣，但𠵱家主力從商，在北京及廣東省都有製造業、食品、蔬菜及房地產生意，要暫放低生意回港拍劇，首要有好劇本，亦要分配好時間。

長居北京嘅Marco冇乜留意香港娛圈，但大讚跟陳展鵬及吳若希合作好有火花。

同視帝陳展鵬鬥戲。

呢場戲好有火花。

吳若希跟偶像盧慶輝演對手戲時內心其實好緊張。

盧慶輝在內地從商多年。

生意越做越大。

家燕姐帶挈處男登台

2017年，Marco出山拍TVB劇《賭城群英會》，講到最深印象劇集必定是1996年的《真情》，「作為一個新人，可以同咁多老戲骨如家燕姐(薛家燕)、司棋姐(李司棋)、蝦叔(關海山)、丹爺(劉丹)等合作，真係學到好多嘢，最難忘有場要講3頁紙對白，我驚到係咁NG，蝦叔不但冇怪責我，反而教我『唔使驚，只要閉眼去投入角色，啲對白一下子就會出嚟！』果然一Take過ok。」Marco更激讚戲中媽媽薛家燕好有愛：「佢真係好好，成日帶埋演員去登台搵真銀，我處男登台係去雲頂，都係由家燕媽媽帶挈，當時對住8000觀眾唱歌驚到腳震，不過越唱越high，返入後台要求家燕姐畀我唱多首。」

2017年Marco出山劇作係TVB嘅《賭城群英會》，演大奸角梁sir。

1999年演出最後一集《真情》，家燕媽媽喊住攬實盧慶輝。

拍《真情》期間，盧慶輝跟彭子晴戲假情真。

當年《真情》演員有唔少出外搵真銀機會。

家燕姐好照顧《真情》演員。

張國榮好Nice撩傾偈

另外，官仔骨骨的盧慶輝曾跟已故巨星梅艷芳及張國榮(哥哥)合作：「1993年做model時，同哥哥拍過汽水廣告，我係其中一位工人，雖然小角色，但休息期間哥哥好nice，主動跟我交談，好奇追問我身高？係咪有心做呢行？嘩！super star同我傾偈，既驚又喜呀。」至於1997年獲梅姐欽點演出她的《音樂特輯之三誓盟》傳出緋聞，Marco當年被指自編自導，當事人講返件事都勁尷尬：「唉！傳到亂晒籠！呢個圈好多時會亂傳。」他即還原真相：「冇㗎，佢(梅姐)係大姐姐，搵我拍嘢梗開心啦，可以同偶像近距離接觸喎，一班人只係走埋一齊研究點拍，拍完咪走囉，之後都冇再聯絡。」

1997年，盧慶輝擔任《梅艷芳音樂特輯之三誓盟》男主角。

音樂特輯中飾演一對。

特輯在日本取景。

Edit media 兩人有瞓埋一齊嘅床戲。。

盧慶輝及陳子聰擔任《梅艷芳音樂特輯之三誓盟》男主角，故事講述3人的3段宿世姻緣。

當年曾跟張國榮拍過汽水廣告。

Marco坦言同偶像傳緋聞唔開心，因為「假嘅嘢係唔應該嘅，所以好難受。」加上當年他有好多負面新聞，如2000年於澳門disco與有勢力人士爭執，遇襲毀容。Marco坦言父母係傳統潮洲人，兄與嫂及兩個胞姐均任職銀行，所以見自己年紀唔細，無謂令家人擔心，故漸漸淡出及轉行。

2000年，盧慶輝於澳門disco與有勢力人士爭執，眉心位置縫咗20針。

年齡你話幾多就幾多

Marco對於當日決定零後悔：「人生走嘅每段路，上天冥冥中有指引，好壞都好係成長必經階段，好嘅要堅持；否則要反思，漫長人生都要繼續行落去，所以啲人讚我咁多年都Keep得好，零走樣，其實除咗唔食太多，多郁動外，心態亦要開心啲。」已婚13年及育有9歲兒子的Marco形容目前生活得好好，又帶笑澄清，真實年齡少於55歲，出生年份亦非1968年，至於實際年齡？「哈！年齡只係數字！大家話幾多咪幾多囉，話我80歲都冇問題，阿倫夠話自己年年25啦。」