獨家丨林保怡呼籲多年Fans買飛入場：唔好得把口《白日之下》演魔鬼院長獲姜大衛讚超班

2023-11-10 07:00

58歲林保怡入行37年，在電視圈奪獎無數，最近終憑電影《白日之下》的殘疾院舍院長「章劍華」，首獲提名金馬獎最佳男配角。保怡為角色極速增磅，又向視障人士攞料，花盡心思投入眼中的「魔鬼」角色。開心拍到好電影的他呼籲觀眾入場，特別是見親佢就話好鍾意睇佢做戲的Fans，「嗰啲麻煩唔好匿埋，出嚟買張飛支持吓我。」對於獲偶像姜大衛勁讚演技超班，他大表感動，更對鏡頭笑言：「我冇請錯你（John哥）食飯。」採訪：杜杜攝影：Stanley 場地:K11 Art House

保怡以平常心對待入圍金馬，更當自己攞咗獎。

數年前，簡君晋導演已邀請保怡演出《白日》，因檔期問題拒絕了，之後投資者古天樂再推薦他，「之前得大綱，到古仔畀我嘅時候，我咪再認真去睇劇本，嘩！呢個角色好魔鬼，正呀！哈哈！」又指最終可以合作是緣份，「若干年前接咗，可能唔係佢哋嚟，好似捉棋咁，一個好強勁嘅組合不經意出咗嚟，香港有套咁好嘅電影。」

保怡眼中「章劍華」是個魔鬼，要投入演出就必須喜愛他。

個幾月快速增肥7公斤

保怡演繹「章院長」跟以往角色感覺大不同，「通常係呢個角色好正，我去演啦，但我係相反，我好唔鍾意呢個角色，我要去演。但決定做嘅時候，我要喜愛佢𠻹！要活喺呢個角色裏面，佢係有層次又立體嘅人，唔可以憎佢。」衰院長有嚴重弱視，導演安排他跟視障人士接觸，保怡覺得齋講唔夠，邀請對方食晏，以便觀察對方所有舉動來模仿，「佢係20幾歲嘅青年人，由佢離開座位，我跟住佢一路行，落到樓下，經過好多障礙，例如啲卡板、垃圾桶，又有好多路人，我一路喺佢後面問佢問題，佢每個小動作，我入晒落個袋再消化，跟住做返出嚟。」由於角色原型比較肥，保怡用了個多月時間增磅，「我本身73、74公斤，增到80公斤，我冇肚腩，加咗個肚腩畀我，仲有留鬚留長頭髮，去到現場再一筆筆幫我畫到一層層斑白，妝都冇乜點化。」

保怡讚余香凝未埋位已好入戲，「佢喺現場唔係好睬我，好入戲，好憎院長。」

跟梁雍婷首合作的保怡，互動夠過癮，「好鍾意佢做啲冇預期出現嘅嘢。」

希望粉絲唔好得把口

2004年保怡憑TVB劇集《金枝慾孽》首奪視帝，2010年再憑劇集《掌上明珠》，獲得《亞洲電視大獎》最佳連續劇男主角。1986年已加入影壇的他，直到《白日》才首獲電影獎項提名，「如果畀我早啲拍電影，都會早啲有提名，冇機會咋嘛！香港有好多好好嘅演員，唔止我，不過冇機會，希望各個老闆可以畀多啲機會大家，新故仔，新題材，新角色，畀多啲新演員，我呢啲做咗咁多年差唔多。」保怡覺得今次好幸運，遇到好角色、好劇本和好對手，最難得寫實題材仍有老闆肯投資，「我好知足，好開心快樂，我當攞咗獎。」保怡又認為心態最重要，「攞咗獎我又要搵地方擺，個櫃都已經滿晒，哈哈！講笑啫！多個獎一定係開心，但有與冇，我呢度（心）已經有咗，呢種心態好耐之前已經有，一定要滿足知足。」他更呼籲粉絲買飛入場支持更實際，「有好多街坊，或者好多見到我話好鍾意睇我演戲，嗰啲麻煩唔好匿埋，出嚟買張飛支持吓我，唔好成日得把口。」

2004年，保怡憑《金枝慾孽》首奪視帝。

2010年保怡憑《掌上明珠》，獲得《亞洲電視大獎》最佳連續劇男主角。

多謝偶像姜大衛讚好

在《白日》演院友的姜大衛（John），接受本報訪問時力讚保怡角色難度高，「𠵱家個個鬧院長，唔係鬧林保怡！就係做戲做得好，將觀眾帶入角色，去鬧個角色佢就成功。」更稱的確較自己更應得到提名。對被前輩高度讚賞，保怡相當感動，「你一提到John哥，我好認真聽，因為我好細個，姜大衛老師已經係我偶像，爸爸帶我去睇佢套《十三太保》，John哥攞影帝，我都只係一條毛啦！哈哈！」承認院長角色難演的保怡越講越滿足，稱從John哥的一番話學到好多嘢，「John哥做得好好，佢將好平凡嘅角色，做到好有層次，好有喜怒哀樂，佢加咗好多嘢落去，例如搶佢（余香凝）支煙，係好有經驗演員先做到，John哥咁講係讚緊我，我係全收嘅，多謝！我冇請錯你（John哥）食飯，哈哈！」