星8卦｜「少爺仔」追求「妹仔」玩純情落錯注揭「妹仔」性取向

2023-11-07 11:00

「妹仔」真係好聰明，一直吊住「少爺仔」嘅胃口，欲拒還迎，搞到「少爺仔」個心囉囉攣。「妹仔」單親家庭長大，阿媽對男人完全失去信心，自細佢就見兩個女人出雙入對，同牀共寢，所以佢覺得兩個女人一齊係好正常好開心。「妹仔」喺學校亦都同女仔玩埋一堆，雖然佢個款係會有好多男仔追，她始終不為所動，可能老竇成日打到阿媽豬頭咁，見得多有童年陰影啩！

「少爺仔」都唔係純情，恃住個老竇夠猛料，無人唔畀面，溝女溝到中港台三地，「妹仔」看在眼內，梗係唔會咁易落搭，所以用吊大魚嘅方法，睇吓「少爺仔」幾有耐力，反正佢又唔係特別對男仔有興趣。每次收工「少爺仔」都親自送「妹仔」返到屋企門口，然後多多藉口唔肯走，情況好似一對少男少女搞緊初戀，感覺幾動人，所以「少爺仔」今次竟然玩認真，覺得呢種感覺前所未有，決定同「妹仔」糾纏下。

最終「妹仔」頂唔順，有次約「少爺仔」去下午茶，然後叫埋自己嗰位女朋友出嚟介紹畀「少爺仔」識，話明自己唔會鍾意男仔，大家保持好朋友關係都未必好，「少爺仔」無癮到一個點，繼續同眾多女友風流快活，唔再認真。