獨家丨傅嘉莉讚星爺墨寶有神效跪求合作扮「火雞姐」有正評當精神食糧

2023-11-03 07:00

傅嘉莉（Kelly）在劇集《香港人在北京》飾演男人婆「Funny」，大玩劇本殺化身《食神》及《少林足球》經典角色「火雞姐」和「阿梅」受關注，為扮得神似甘願變「飛機場」，最搞笑難得有正評，開心視留言為精神食糧，甚至大晒星爺墨寶，透露有神奇功效𠻹。採訪：杜杜攝影：羅安強髮型 :Ray Mork@Admix hair styling 服飾:@faa official hk 場地:荷里活廣場莆田

Kelly雖然做過9年模特兒，但零偶包唔一定要做靚女角色。

Kelly花了不少功夫準備扮嘢戲份，除了狂loop兩個角色的片段，模仿當中神髓外，還在造型上花心思，就連身形亦刻意配合，「50幾日拍晒套劇都幾急趕，我越拍越瘦，『Funny』係男人婆，唔應該有豐滿身材，加埋我着sport bra真係所淨無幾，好似飛機場，都幾似當時莫文蔚咁瘦，好啱個角色。」為配合劇情，Kelly專登用平價假牙，因為太鬆竟然諗到以Blu Tack黐住，「臨拍時就抺乾晒啲牙，唔飲水，有口水就會甩，仲要用丹田講嘢，慢慢講先講得清楚啲字。」

Kelly扮「火雞姐」但講「阿梅」對白，相當神似。

Kelly本身並非「飛機場」，但為角色唔介意犧牲。

為同星爺合作乜都制

重現經典有人讚，亦難免有負評指舊瓶新酒，不過無損Kelly心情，「今次負評算少，99.9%係好，得嗰0.1%算鬧得少，仲有網民幫我平反𠻹，話好多作品都有仿效之前作品，所以唔會令我唔開心，反而佢哋嘅留言成為我近期精神食糧，有時唔開心都會即刻睇返，好有正能量。」

劇中Kelly最初暗戀洪永城，最終發展成為一對。

拍攝《香港人》其間，Kelly不用開工就上堂及做功課。

Kelly是星爺忠粉，大讚偶像所送的「心想事成」墨寶超靈驗，「除咗我今次個角色受關注，讀書一take pass（寶石學文憑），嗰時諗住就嚟考試，星爺出post問邊個想要，完全冇諗過會得到。」為見到星爺，她更自薦求合作，「佢有套電影公開招募嘛，我都悉心準備咗個profile寄去，有機會合作做乜都得，可以做條死屍，一日導演唔嗌cut都做落去，哈哈！」