專欄｜有幸見證夏神發光發亮

夏薩特喺10月10號宣布退休，好多鍾意佢嘅球迷即時好大反應，亦有部分球迷眼中就淨係識食漢堡包，無紀律嘅球員。但小弟喺過去三四日回望佢整個車路士生涯，先有深切嘅感觸。

小弟今年先20歲，要講到有畫面定必係2014至15球季車仔攞英超一屆。每場睇住夏神點樣左穿右插，明明係俾人重重包圍，依然可以殺出一條血路，令我了解到車路士嘅標準同對勝利嘅執着。不過呢個球員就係一季好一季差，翌季就同班Friend反轉更衣室玩死Daddy。我嗰陣時百思不得其解，夏神點解要咁做？干地嘅兩個球季就好似再經歷呢個輪迴，只係片段更加深刻，令我明白到咩叫辦公室政治，但有料嘅人根本唔會驚，佢會用表現去征服你。

去到告別嗰季，好早知道佢會離開，有好多嘅最後一次，尤其喺巴庫大放異采為車路士再次舉起歐霸盃。最後訪問講咗一句「It\'s Time To Say Goodbye」，嗰一刻我知道一切都完啦，喊咗出嚟。

近一兩季我先明白點解車路士有夏薩特係好幸福！因為佢先係真正嘅魔術師一個人玩晒，差唔多俾人除晒衫，都能夠喺頂帽入邊抽隻白兔出嚟嘅一位天才。

即使去到皇馬無一場好波俾人鬧，但我好慶幸沿途可以望住佢發光發亮，已經足夠。記者問佢退休嘅原因，佢話唔享受足球，令近排迷失嘅我，提醒番做自己鍾意嘅嘢最緊要，做人就係咁簡單，我愛你夏薩特！Willhappy

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ