獨家丨樂宜慘被「圈中人」呃400萬：同佢唔係朋友合資8位數做醫美生意唔熟唔食

2023-10-20 07:00

在「2021年世界最性感DJ」中排第8的「DJ女神」樂宜，去年7月跟「圈中人」及友人合資8位數，開設醫學美容院並擔任代言人，但開業不足半年已爆出金錢糾紛，樂宜更收到恐嚇電話。今年7月，樂宜受訪表示開美容院冇金錢損失，但《頭條日報》收到樂宜密友報料，稱睇唔過眼「圈中人」呃完老友錢當冇事，決定踢爆事件內情。本報向樂宜查問，她坦認事件並已交由司法機關處理，更稱跟「圈中人」已絕交。採訪：諾埃爾

樂宜是「2021年世界最性感DJ」第8名，在DJ界闖出名堂。

著名DJ Alan Walker來港開騷，任嘉賓的樂宜中門大開勁Sexy。

去年11月，樂宜有份的美容生意爆出金錢糾紛，身在美國的「圈中人」立即返港並稱已交律師處理，樂宜則收到恐嚇電話，因為嚇親即報警求助。今年7月，樂宜表示已跟「圈中人」拆夥，並語帶相關：「嘥咗心機同時間，不過學到好多美容同做生意知識，因為所有嘢都親力親為。（同「圈中人」有冇聯絡？）冇再聯絡喇！都會再嘗試做生意，但搵拍檔會謹慎啲。」

樂宜有外號「DJ女神」，入行8年儲落唔少錢，絕對係小富婆。

樂宜經常上載性感靚相到IG，難怪有46萬Followers。

投資100萬變500萬

原來樂宜唔止嘥咗心機同時間，更懷疑被騙逾400萬。樂宜閨密主動向本報爆料，「樂宜好信『圈中人』，因為『圈中人』早過樂宜入行，會提點吓好快熟絡。」因為疫情，主力打碟的樂宜收入歸零，雖然有積蓄，但都擔心唔知要捱幾耐，於是同「圈中人」傾訴，即被對方游說入股美容院，密友說：「『圈中人』同樂宜講每人夾500萬，搵埋『圈中人』中學同學，3個人夾埋1500萬開醫美店，仲話益樂宜做埋代言人，其實邊算益啫，做代言人應該有錢收𠻹！」

樂宜曾經跟友人合資8位數創業。

密友又稱「圈中人」當時跟樂宜表示想加快工作進度，但等唔切開公司戶口，於是叫樂宜直接將500萬過落她的私人戶口，「樂宜好信佢咪照做囉！開舖後一段時間，樂宜開始覺得奇怪，唔知點解『圈中人』一直阻止佢同另一拍檔單獨見面。」直到有一次「圈中人」出埠，樂宜聽到同事講美容院唔夠資金落廣告，「樂宜奇怪合資咗1500萬，幾個月咁快用晒？於是趁『圈中人』唔喺香港，就主動問另一拍檔點解每人夾500萬都會唔夠錢落廣告，拍檔竟然話唔係夾500萬喎，每人夾100萬咋！」兩人溝通後，懷疑有人成本都唔使拎，仲有錢落袋，隨即向司法機關舉報外，更向「圈中人」追討400萬差額，「嗰時『圈中人』即刻喺美國返嚟，係咁求佢哋唔好公開件事，仲話會用盡方法還錢。」

去年11月，醫美院爆出金錢糾紛，當時剛巧蔚雨芯跟陳靜在美國。

承認同「圈中人」反目

樂宜日前出席活動，記者問到是否被「圈中人」呃錢，她冇否認，「我哋發現一啲帳目問題，同parter都覺得唔可以再合作，我哋兩個一齊退咗股，cut晒啲嘢，有報司法機關，詳情唔講住嘞。」問到「圈中人」是否已還錢？她說：「所有嘢都處理好晒，好快我哋已經割席，完全冇關係，我同另一個parter就開始新嘅嘢。」