頭條戲場丨《無處逢生》史上最忙女主角

抗拒唔到求生類電影，如《劫後重生》、《127 小時》及《珠峰浩劫》等等，見到Netflix出品的西班牙驚悚片《無處逢生》海報，一個海中飄浮的貨櫃加一個女人，唔使睇介紹都知發生乜事。冇錯，為逃離慘遭極權暴政摧殘的國家，大肚婆同老公選擇偷渡，然後老公冇咗，大肚婆困在本用作匿藏的貨櫃，孤零零一人漂流在汪洋中，叫天不應慘到黐線。撰文:廖思慧
 

Mia本來好依賴老公，但漂流嘅一個月令佢急速成長。

Mia老公，好快就死咗。

求生類電影離唔開為主角製造無數希望同絕望，觀眾邊睇邊諗發生在自己身上會點做?《無處逢生》多少少新意，由拎過哥雅獎（西班牙奧斯卡）最佳新演員的Anna Castillo飾演女主角Mia，偷渡客死剩佢一個，身上得少量水同食物及數個裝滿貨的木箱，內有大量食物盒、衛衣、膠紙同earphone等，Mia發現全部唔食得相當失望，但去到後期，以上所有被Mia視為廢物的貨品全部都派上用場，仲救佢一命，絕望變希望睇到好肉緊。

Mia身處的國家要排除冇生產力嘅孕婦同細路，所以同一班大肚婆著草，但死剩自己。

Mia從貨櫃嘅窿向外望，是唯一連接世界嘅方法。

望出去得個海真係灰爆。

 

因為得Mia一個，入水速度唔算太快，但都嚇餐死。

Mia就係匿喺呢個貨櫃喺大海飄足一個月。

會睇到大叫
全片最喪係Mia喺入咗半箱水的情況下生仔，使唔使咁慘先?唔止呀，加上行雷閃電又橫風橫雨，個貨櫃搖擺如海盜船，生仔前中後期都好觸目驚心，睇到不斷唞大氣。我對於血腥有個奇怪位，即係打到爆頭同斷肢嗰類我係OK嘅，但夾硬剝牙呀，突然鎅親見肉嗰啲就接受唔到，戲中有幕大癲鏡頭，就睇到唉唉聲。

Mia絕對是史上最忙女主角，從來都話睇戲唔好駁戲，但真心疑惑，可以生火點解唔燒魚食?電話舊電超級長命，OKOK再駁冇人拍戲，電影偏長，Cut短半個鐘就非常好嘞。

最大反駁位，冇叉電成個星期都仲開到電話。

唔想咁快入水，用膠紙遮住啲窿，頂住檔先。

全靠有B，否則Mia應該一早放棄求生。

《星島頭條》新網站有更多精彩內容：http://www.stheadline.com/