頭條戲場丨《玩謝華爾街行動》金融界大革命之韭菜起義

2023-10-13 05:00

2021年，美國發生咗一單散戶打冧對沖基金大公司的股壇奇聞，在全球引起暴風式討論。電影取材自呢單真人真事，雖然唔識玩股票，戲中好多名詞亦唔知點解，但睇得好開心，死仔Pete Davidson一出場我就笑，最重要係成件事好熱血，一班被大鱷視為地底泥的韭菜夾埋起義，最終令多家對沖基金公司蒙受巨大損失，梅爾文資本（Melvin Capital）最慘，損失達68億美元(約531億港元)，翌年更關門大吉。(上映中) 撰文:廖思慧

佢就係「咆哮小貓」Keith Gill(Paul Dano飾)，一個咁唔起眼嘅投資YouTuber可以令全球網友願意「相信」佢，好有本事。

Shailene Woodley飾演「咆哮小貓」老婆，對於老公忽然富貴好措手不及。

電影在港上映中

GameStop是一家美國電子遊戲零售商，在講求網絡串流的年代，專門售賣實體電子遊戲的GameStop明顯跟唔上時代注定被淘汰，2019年虧損達7.95億美元，因為經營陷入困境，好多對沖基金機構賣空該公司的股票，再迅速賣出借貸的股份，並藉由低價買回的股票賺取差額。

起義懶人包
因為被對沖基金機構盯上的獵物，是無數美國人的童年回憶，網友「咆哮小貓」決定拎晒53,000美元的畢生積蓄買入被睇低一線的GameStop股票，再拍片放上美國「連登」Reddit討論區的WallStreetBets炒股版。大量散戶陸續跟風入市，旋即推爆GameStop股價，全民一夜致富，最重要破壞做空GameStop投資基金公司的計劃，導致部分對沖基金公司被迫趁股價未到最高時購回股票止血，Melvin Capital據報動用20億美元彌補損失，此事成為當時全球矚目的股壇運動！

護士Jenny(America Ferrera飾)，本來好窮，深信阿Keith而致富。

GameStop售貨員Marcus (Anthony Ramos飾)被經理睇死，暴富後即辭職。

(右)靚女Harmony( Talia Ryder飾)及女友Riri(Myha'la Herrold飾)亦是信徒，本來又係窮到燶。

曾執導《黑白魔后》的導演Craig Gillespie拍此片嘅目的令人感動，「電影是獻給社會中的小蝦米們，希望在財富不均的社會中給予眾人一點希望，甚至最後能夠改變這個體制。」講多一次，對股票零認識唔會睇唔明，亦冇一般股票電影咁大資訊量，輕鬆好笑，散戶小人物亦好得人鍾意，經常被當作「韭菜」收割的嘅散戶終於能夠一吐怨氣。散場後好開心，良心推薦。