獨家丨陳恩碩瞓身搞長壽劇曾被睇死 音樂劇《青春日誌》破紀錄演360場

被喻為「天才導演」的陳恩碩（Tom），25歲便身兼長壽音樂劇《我們的青春日誌》的監製、執導、編劇、作曲及填詞，上月該劇演出360場，破盡香港舞台劇界紀綠。10月將迎來新版本，回想這4年來的起跌，由8年前寫碩士論文時發的夢，再到不被睇好至開創歷史，Tom感觸良多。採訪：杜杜

《青春日誌》上了軌道，Tom最希望放假到英國狂睇舞台劇吸收養份。

2018年，Tom編寫《青春日誌》時連自己都唔睇好，「貼地嘅音樂劇唔吸引，朋友、演員睇完第一稿都覺得悶。」經過多次修改，到最後總綵排才開始有信心，「請咗阿爸阿媽同向海嵐嚟睇，都睇到喊晒。」不過他仍不敢有期望，直至見到首演觀眾的反應才信可行，「觀眾啲笑聲此起彼落，完騷又個個喊到豬頭，嗰場係資深青年商會包場，全部40至60歲嘅人，佢哋話搵返青春，同青春越嚟得遠嘅人越有感受，開始覺得呢個劇係有啲嘢。」

15歲便首次執導音樂劇《油脂》的Tom，連鍾景輝都撐。

《青春日誌》演出超過300場，Tom知道有粉絲睇超過50次好開心。

論文題目成功實踐

Tom在英國讀碩士時寫的畢業論文，已經探討香港做長壽音樂劇的可能性，「我理念係想擴大香港個巿場，等舞台劇工作者容易啲生存，睇劇變成香港人習慣，我一定要喺香港試一次，哪怕最後都係失敗。」2020年，他着手籌備將《青春日誌》變成長壽劇，當時完全冇人支持他，除了租場地處處碰壁外，搵投資者更加困難，「要1千萬起動費，啲商業機構通常都話你個理念好好，但賺唔到錢唔會投資，如果平均得5成票房，要24年先回到本。」幸好最後得到英皇支持，他期望5年能回本。

Tom在倫敦大學皇家哈洛威學院，修讀戲劇及哲學。

Tom由搵場地到裝修歷時1年，才能讓《青春日誌》以長壽劇模式演出。

由不被睇好，到300場演出時一票難求，Tom好感觸，「雖然現場得150個觀眾，但氣氛好似去咗紅館，最感動係最初冇人相信嘅事，竟然喺香港出現，有人支持就繼續做落去。」展望未來，他希望該劇真正長壽，「希望做到我死都做緊，咁先叫long-run，跟住《小男人周記》都想做第2個long-run show，要做到成行成巿，先可以改變香港人睇劇文化。」另外，《青春日誌》除會推出原聲專輯，還計劃改編成電影及電視劇。

新版《青春日誌》，除限定演出的關寶慧（前左三）和蘇韻姿（前右二）外，還有《造星V》的MK（簡可圖）（後左四）。

鄭丹瑞一直很欣賞Tom，還讓他改編《小男人周記》做音樂劇。

 

《星島頭條》新網站有更多精彩內容：http://www.stheadline.com/