獨家丨尹光爆舊史曾勁嬲葉子楣:嗰陣死忍縱橫歌壇68年大爆娛圈潛規則

2023-10-12 07:00

3個月前「AI尹光」Cover姜濤的《Dear My Friend,》及林家謙《一人之境》等歌曲成為全城熱話，79歲尹光突然翻紅更被封「光B」，收入激增8倍以上，更帶挈他重返闊別14年的紅館，於11月4日舉行《尹光WAN K.宇宙巡邏演唱會》，下年80歲(按當事人透露)生日更打算搞慈善Show回饋社會。見證香港樂壇興衰，屹立不倒多年的尹光大爆娛圈潛規則，又開心分享3大襟撈秘技，邊一個行業都啱用，再自揭收埋多年嘅「小器簿」。採訪：方騫平攝影：鄧國良

「AI尹光」令年青一輩認識尹光，「光B」笑言聽歌當然要聽真人發聲。

尹光親自透露原來明年經已80歲。

80歲嘅尹光真係Keep得好fit。

尹光明年會舉行慈善粵劇騷回饋社會。

光b好可愛呀。

尹光心境仲好年輕。

1991年，當年酒廊及夜總會式微，「廟街王子」尹光一年登上3次紅館開個唱，創下佳績，令打算轉行的他起死回生。18年後，再舉行《2009爆金爛演唱會》，連尹光都估唔到，時至今日獲AI再推上紅館。今次除會選唱首本名曲《少理阿爸》、《雪姑七友》、《荷里活》、《數波波》等外，還會演繹「AI尹光」唱過嘅歌及首次演繹冧歌《Dear Myself》。至於可會請埋姜濤做嘉賓？尹光堅持交由主辦方特高娛樂負責，因為他朋友太多不便參與。

「AI尹光」Cover林家謙《一人之境》成為熱話。

「AI尹光」Cover姜濤的《Dear My Friend,》。

1991年尹光一年登上3次紅館開個唱，創下佳績。

尹光融入年青人世界，2009年《尹光爆金爛演唱會》已搵農夫做嘉賓。

一身Barbie shocking pink西裝的尹光，相隔14年再挑戰紅館。

演唱會好有創意。

環星老闆張國林安排光哥處男演繹冧歌《Dear Myself》。

尹光交由主辦方邀請表演嘉賓，唔知姜B有冇份呢？

觀眾都想林家謙做嘉賓。

尹光努力練習二胡版嘅《Dear My Friend,》。

尹光同年輕藝人好玩得埋。

搞慈善粵曲個唱賀大壽

尹光諧趣歌曲風格無可取代，雖然「獨市」，但曾賭錢輸身家，每月跑數的他依然抱住天跌落嚟當被冚態度，只要有工開就唔怕冇錢還，直至1984年開始戒賭及儲錢。尹光目前乘勢狂接廣告，坦言連坐喺度拍兩吓掌聲都有錢收，追問係咪搵好多？他即敏感收口：「唔講錢，錢多少唔係問題，𠵱家最重要身體健康，我唔會餓死，好一餐；唔好又一餐。趁明年80歲生日，搞慈善粵曲演唱會，扣除一啲拍膊頭開支，一個仙都唔收全數捐晒出去，回饋社會，亦永不言休。」

原來尹光明年迎來80大壽，打算搞慈善粵曲個唱回饋社會。

早年尹光偕太太李麗儀拍住上登台，一晚走多場還賭債。

趁明年80歲生日，尹光打算搞慈善粵曲演唱會。

最近尹光工作量激增8倍。

歌星越界交友只會變𤓓

唱足68年，好有經歷的尹光勇於分享人生大道理及娛圈潛規則：「呢行人氣相當重要，去到呢級不能爬上嗰級，一線歌星會有一線歌星班Friend，唔會同2、3線歌星玩，因為『我名咁大點會同你玩！』正如有錢人有上流社會朋友，窮人有窮人圈子，好正路。雖然有啲人口講話乜都得，但未到嗰個位唔會知係點，好似啲人話中咗六合彩會分錢畀人，因為未有嘛，做咗皇帝就想升仙啦…不過，我好肯定唔會咁樣對人，因為我只係一個唱歌搵食嘅普通人，任何人叫我合照都得。」

尹光自言唔係明星，作為普通人個個都可以跟他合照。

好識玩social media嘅尹光配合首本名曲，入主題公園尋找雪姑七友。

細歌星食得鹹魚抵得渴

自言睇化晒嘅尹光仲寄語後輩要忍得：「尤其細歌星要食得鹹魚抵得渴，鬼叫個名唔夠人哋大咩！」尹光再自揭收埋心底多年嘅「小器簿」，稱當年舉行演唱會記招，明明自己係主角，受訪中段記者竟跑晒過去搵剛到場嘅「波霸」嘉賓葉子楣，受冷待的他勁冇癮：「嗰日好心酸，連主角都要企埋一邊係會介意嘅，但都要忍呀！咁人哋係『波霸』咁有名，我『數波波』都有排數啦。」尹光坦言同行如敵國，唔抵得人哋紅過自己，唔忍得係好戇居嘅事，「不過，𠵱家唔會再爭風呷醋，因為我個位置冇人攝得到，全港歌手冇人唱我啲歌，如我喺日本就係政府包養嘅國寶，所以你鍾意點就點，最重要行得、食得、走得，開開心心就算，我同葉子楣反而做咗朋友，不時會相約食飯。」另外，呢行信用好重要，他唱歌多年敬業樂業，有早冇遲，會落力記好歌詞。