專欄│拜仁瑰寶當屬湯馬士梅拿

香港隊嘅奇蹟之旅，對住強過我哋嘅對手，旁述會話佢哋「一人跑多一步」，但小弟近排睇拜仁一直都覺得無人肯跑多一步，形成經常上半場齋搓，下半場靠個人質素屈機嘅局面。但有一位球員，每當佢落場，隊波組織隨即多咗流動性，佢就係湯馬士梅拿（TM）。

TM呢位球員喺足球界好特別，速度唔算快，個人盤扭亦唔算強，佢嘅賣點定必係閱讀球賽能力，適當嘅時候出現喺適當既位置，佢喺拜仁咁多年都係骨幹，只係近幾年年紀漸大，體力無以前咁好，開始要坐板凳。

拜仁今季即使面對實力差不多嘅對手，感覺都係好難佔優，前場球員經常企死啲位置，哈利卡尼每當被對手凍結，中後場就遲遲分唔到波，導致經常斷纜，例如上周德甲面對有質素而且會嘗試壓逼嘅RB萊比錫一役，當中2個失波就係活生生嘅例子。唔係話穆斯亞拿、利萊辛尼或京士利高文唔好波，但佢哋都屬於要上腳既球員，好多時候習慣等波到，加上佢哋用波時嘅第一選擇都唔係傳波，而係扭幾個對手再起腳射，所以TM喺度就可以畀教練多一個選擇，因為佢就係往往為隊友着想嘅球員。正如剛周中歐聯作客哥本哈根致勝嘅一球，TM明明單刀，雖然速度唔夠快俾對方後衛追上，佢仍無夾硬射，而係先食身位護住個波，再助攻畀走個靚位嘅隊友馬菲斯泰爾近門射入，完全凸顯出佢嘅足球智慧。

TM一年大過一年，對球隊影響力越嚟越細，一定係事實，但我每次坐喺電視前睇佢踢波，依然會讚歎佢喺球場上嘅每一個決定，每一個選擇，佢就好似有上帝視角，跑一個只有佢先走到嘅靚位，TM真係一個Special One。Willhappy

-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ