獨家丨何廣沛勁嬲網民作故仔：你哋知啲咩啫　忍無可忍「上水」回應食人妻抹黑留言

何廣沛在劇集《你好，我的大夫》演中醫，由唔睇中醫到拍攝後完全改觀。講到被爆跟女公關Sarah Miu（苗承諾）拍拖後，曾多度「上水」回應賤嘴網民，鬧他食軟飯係渣男，又放料抹黑朱晨麗，廣沛自爆已被網民狙擊大半年，認為有人居心不良，破壞他辛苦建立10年的正面形象，忍無可忍才以真身留言嘲笑，「我唔出聲你就係咁講！」坦認跟新歡有結婚打算的他提到「舊愛」朱晨麗兩個態度，強硬地劃清界線。採訪：杜杜 攝影：朱偉彥 場地:Velo Italian Bar & Grill

廣沛入行10年首次親身「上水」回應負評，也好奇為何成為網民狙擊對象。

在《大夫》演中醫博士「辜清勁」的廣沛，以往較少接觸中醫，亦對針灸有恐懼，「拍完呢套劇改觀咗，劇集帶出嘅信息，就係希望大家重新認識中醫。」最近他扭傷頸，都有搵劇集的顧問中醫幫手，「𠵱家夠膽嘞！呢個月都有做針灸，仲人生第1次拔罐𠻹！」入行10年才跟蔡思貝合作，廣沛形容感覺非常之好，「始終佢好有經驗，當然唔係講佢老，佢係拍得密亦都拍得多，同佢開工就唔需要擔心太多嘢，大家都係『fit馬』。」兩人合演感情戲更加得心應手，「去到現場就做，唔使就住就住去到好盡。」

廣沛演過中醫後，𠵱家連針灸都唔怕。

廣沛大晒後頸上，人生首次拔罐的戰績。

廣沛自誇跟蔡思貝同為「fit馬」，合作特別順利。

言論自由唔代表任意抹黑

廣沛大方認戀女公關Sarah後慘被網民圍攻，他稱女友是圈外人較難承受這類壓力，「每個人嘅接受能力都唔一樣，呢個可能要靠我去開解或者去紓緩，順其自然，只不過係1次性報導，唔會係持續性或者困擾性嘅影響，相信佢過一排會冇事，會越嚟越習慣。」

廣沛跟女友Sarah拍拖大半年，已朝結婚方向發展。

講到網上的抹黑留言，廣沛原來早在大半年前已獲粉絲報料，初時還覺得幾有趣，「佢哋柯南上身有啲真有啲假，真嘅咪講囉，都post咗隻狗出嚟，但我唔需要同佢哋交待，佢哋冇得fact check，事實得我先知。」後來他決定「上水」回應，因情況越來越失控，「不厭其煩散播啲謠言或者佢哋認為啱嘅嘢，作咗好多故仔，我咪用啲好幽默嘅方法，『你哋不如去TVB考編劇做編劇啦，你哋咁有創意』，佢哋喺每個相關新聞下面都留一樣嘅抹黑留言，講1次OK，但喺度帶風向就唔係咁好。」他越講越滾，認為這批網民另有目的，「每個人有言論自由，但係唔需要帶風向係咁去唱，影響人哋嘅思想，煽風點火，居心唔係咁好，點解要逼人相信你嗰套呢！？」

女友Sarah被起底已離婚，廣沛表示一早知情。

廣沛以嘲笑口吻回應負評，句句有骨。

廣沛稱抹黑的內容相當廣泛，但又完全冇證據支持，「話我食軟飯、一腳踏兩船、食人妻啦！又喺網上起底式搵好多timeline相，真係得啖笑，啲相真係唔關我事，話係我隻手又話係我隻錶，你哋知啲咩啫，我唔出聲你就係咁講！」網民更屈他向傳媒放料抺黑朱晨麗，「呢單你幫我澄清嘞！話我私底下報料畀傳媒做新聞，我其中1個回應都話『你邊度有證據證明我放料畀傳媒呢』，過去10年傳媒都知我作風低調，專注工作，我做咩要無端端放料畀傳媒呢？！你哋認識嘅何廣沛都唔係咁嘅人！」

廣沛直言post得跟女友狗狗合照，預了被外界知。

同朱晨麗咁多年都係同事

廣沛最㷫有人企圖破壞他的正面形象，「佢哋立心不良到一個點，見香港嘅傳媒冇報導，話要發去等佢哋報導，想破壞我呢10年嚟默默建立嘅形象，描述到我係佢哋認為嗰種食軟飯、渣男，喺內地有個詞叫「海王」（即同時跟多人搞曖昧），將呢啲標籤擺落我度。」幸好他得到不少心水清的網民支持，「唔係熟識嘅fans，未見過嘅，喺我回應下面支持我。」他又自問在圈中一直待人不薄，不明為何突然成為箭靶，「同我合作完都知我從來冇害人嘅心，無私奉獻我知道或者我識嘅嘢，陳曉華或者郭柏妍喺訪問都有讚過我，唔存在我係個差嘅人囉，明嘅人就繼續明，唔明嘅人由得佢繼續唔明，唔會多講，會用行動去話畀你聽，我係個點嘅人。」

廣沛自問人品不差，否則拍檔郭柏妍也不會公開讚他。

對於有指去年跟朱晨麗分手後，再見不是朋友，問到廣沛現在跟女方關係？他即劃清界線，「同事囉！咁多年都係同事。」有指朱晨麗粉絲有份留言狙擊他，他就認為不會影響兩人關係，「網民有佢哋自己世界，唔影響同事之間。」曾表示已35歲是時候諗結婚，他即甜笑回應：「以前就冇乜點諗，𠵱家就一步步向前行囉，你問我咪公開囉，你唔問我咪繼續工作，我都唔知幾時有答案。」

廣沛跟朱晨麗雖然沒承認過戀情，但早被認定是一對。

 

《星島頭條》新網站有更多精彩內容：http://www.stheadline.com/