星8卦｜「歌手」追錯女同志 情定「鬼妹仔」全靠阿媽出絕招

「歌手」當日認真花心，想溝邊件靚女都無難度，連佢位鬼婆阿媽都頂唔順開聲話應該要停落嚟。問題係「歌手」對每一個都係認真嘅，除咗嗰次鍾意錯「高音」俾人笑到面黃。

「高音」平時唔出聲，亦係姊妹群中最女仔、最討喜，但佢自細就唔鍾意男仔，身邊嘅助手永遠就係佢嗰段時間最愛，所以定時定候就換助手，唔似得其他紅人一個助手用足幾十年。「歌手」又衰嘅，恃住自己紅就瘋狂追，唔識出去收下風對方係乜料，講真你咁紅「高音」梗係唔會得罪你，仲借啲意利用佢嘅知名度幫自己再上一層樓。

經過呢次打擊之後，「歌手」更加變本加厲做情場浪子，總之高瘦留長髮嘅都係佢力追嘅對象，又唔知點解畀佢識到「鬼妹仔」，兩個人一撻即着，最勁係「鬼妹仔」同鬼婆阿媽好啱傾，冧到阿媽當佢係女咁親近，於是「歌手」樂於有人照顧長輩，自己繼續喺出面鬼混。

最後令「歌手」停落嚟係因為阿媽出招，逼佢同「鬼妹仔」結婚，仲出到經濟封鎖嚟嚇「歌手」乖乖娶老婆，結果阿媽娶到新抱又湊到孫。「歌手」近年表面真係好生性，不過久唔久都會出去搵啲無知名度嘅妹妹仔開心吓，「鬼妹仔」志在泊到好碼頭，仲幫手做埋戲，令「歌手」滿意到話一定一生一世喎！

 

【相關文章】：

星8卦｜「高大」被「空靈」拋棄急娶妻療情傷 增肥唔准扮靚變態虐待「秀麗」

星8卦｜「學霸」背景乾淨入豪門 EQ高笑對小三力保阿太位置

星8卦｜「正氣」娶「溫柔」打響如意算盤 遇着刁蠻阿媽遲早玩完

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ