獨家丨Taco做區子琳師弟為新歌齊爆初戀 《造星V》首位囝囝簽唱片公司

在《全民造星V》玩rap玩到過五關斬六將，決賽埋單拎第7的 Taco（黃泓祖），近日為區子琳（Paula）的新歌《甩身》featuring。《頭條日報》收到絕密消息，Taco已簽約Sony唱片，變身Paula師弟。對於成為首位簽約唱片公司的《造星V》囝囝，訪問當日有造型師幫手的Taco 未有否認，「我唔抗拒簽唱片公司，後生想試多啲唔同方法做音樂。」採訪：杜杜　形象:Goran Tse(Taco) 髮型:Haffman Cheng(Paula)、Aki Choi@the attic(Taco) 化妝:onetung ma(Paula)、Queenie Chan(Taco) 服裝: bbc icecream、oasisvintagehk, adidashk場地:Haven Partyroom

Paula和Taco初合作，已有傾不完的音樂話題。

Paula原本已完成《甩身》的錄音，自己唱埋rap部份，但看到 Taco《造星V》演出，令她有新想法，「睇到佢第1次出場嘅表演真係好surprise，都有聽過香港其他rapper唱歌，但佢嘅表現真係好吸引，好有壓台感，再者首歌已經寫好咗，rap嘅部份一路都掙扎緊要唔要自己rap埋，畀大家睇到我另一面，定係搵人feat會令件事提升，一見到佢就決定到。」

Paula計劃下首歌會親自rap。

本身都是《造星V》粉絲的Paula，點會唔記得Taco的招牌動作。

20歲Taco已拍過4次拖
Taco在《造星V》決賽後收到經理人通知即刻答應，「反正《造星V》完咗都冇嘢做。」他聽到歌後太有feel，用1晚時間就寫完Rap詞，較寫自己歌更快，「自己歌要搵題材，Paula首歌已經完成晒佢嘅部份，我清晰知道個故事，只係加啲調味料落去。」對於初次見面Taco已經有貨交，Paula大表驚訝，「冇同佢講想首歌係點，佢從曲風同旋律做咗自己版本，9成接近我嘅諗法，效果真係好好。」

Paula稱Taco拍《甩身》MV時，戴毛毛帽太焗要噴水降溫，搞到唔舒服。

Taco 在MV中飾演幫人做假護照的小混混。

Paula在MV中的暗黑造型，相當性感。

Taco亦享受為非Hip Hop類型歌曲rap，未來亦會製作更多不類型歌曲。

向來愛以自身經歷作為歌曲題材的Paula，《甩身》以她18歲剛入大學的初戀為背景，「其實初戀一定好多嘢唔識，好多拗撬，好多想講又唔敢講嘅事，《甩身》想講兩個人遇到好多挫折，唔開心鬧交，其實灑脫分開，對自己、對方都好，未必係大家有唔啱，純粹唔識表達，或者係唔夾。」20歲的Taco聽着Paula講愛情，搞笑地不斷點頭，因他早在15歲時已經歷初戀，前度是「姐姐」，所以寫詞更得心應手，「第1次一定有呢啲情況，大家為攞安全感冇晒me time，個世界淨係得佢，當對方唔得閒，你會囉囉攣，又會嬲、發佢脾氣，經歷過初戀會學識需要me time。」有4次拍拖經驗的他，現在跟大4年的女友相處，更加如魚得水。

忙完《造星V》，Taco即跟女友到布吉度假。

Paula讚Taco唱歌好Chill
對於成為《造星V》囝囝中，第一個擁有featuring派台歌，Taco直言沒太大感覺，「自己目標係音樂，呢件事只係遲同早，但學到嘢，譬如Paula帶我上《Chill Club》玩，玩完1次攞咗啲經驗，知道有好多唔同形式嘅舞台，《Chill Club》嗰種你唔係令觀眾high，係令佢哋聽歌聽得開心，電視觀眾又要聽得開心，係新挑戰，到有機會出歌唔需要再咁驚咁徬徨。」對首次接觸派台工作，他竟然話：「原來出歌咁麻煩㗎！好多嘢要做，我之前同朋友做完首歌，朝早8、9點就出，都係跟心情去做。」

早前Paula帶Taco到《Chill Club》唱《甩身》，令Taco大開眼界。

Paula和Taco這次合作相當愉快，訪問當日有講有笑相處融洽，希望再有合作機會，提議兩人對調唱和rap身份，Paula興奮提出：「我都想聽佢唱呀！」Taco好謙虛：「我唱歌好屎！」Paula即畀鼓勵，「Taco把聲好有魅力，用顏色形容就好似橙色，活潑啲，少少沙啞，佢呢把聲線好吸引，唱歌係一種Chill嘅感覺。」聽完讚賞Taco個心定啲，更稱有搵《造星V》兄弟學唱歌，「唱歌嘅人好多好叻，唔代表教得好叻，Carson（李嘉俊）本身做老師，同埋我哋係搭的士返屋企嘅朋友，九展一黑咗你就冇車出去，哈哈！」

Taco搵咗《造星V》 Carson（中）教佢唱歌。

今年有機出個人派台歌
本報收到絕密消息，Paula和Taco未來有更多合作機會，因後者已秘密簽約Sony成為Paula師弟，Taco未有否認，「老實講，唔抗拒簽唱片公司，因為我仲後生，呢段時間想試多啲唔同方法去做音樂，呢4年我係咁樣，唔代表後面4年都係咁樣。」他更透露有望今年內推出首支個人派台歌，「我有好多demo，𠵱家學緊攞個平衡，我想要嘅嘢同時又係觀眾想接受嘅嘢。」他又解釋點解唔比賽完就即刻出歌，「人生第1首派台歌，點都會有啲吹毛求疵，我唔想急，可能完咗之後即刻出會好啲，但係我覺得好嘅歌，幾時出都會好聽。」

Taco都有諗過開fans meeting，但認為做多啲歌到時開show更好。

《星島頭條》新網站有更多精彩內容：http://www.stheadline.com/