獨家丨馬賽佛偈回應黑歷史「忍辱最有功德」艷舞片毀前途後悔賣樓同傳媒打官司

2023-09-22 07:00

2008年港姐季軍馬賽(現名馬菀迎)憑著清純外表得到無綫重用，2011年更奪得《飛躍進步女藝人》，本來大把前途，卻因2013年爆出介入內地製片人汪子琦與富婆Laura的同性婚姻，15年離開TVB轉戰內地發展。信佛10年又做咗媽媽的馬賽日前難得回港接受訪問，她不斷拋佛偈，強調做人不用太執著，對於近年港姐是非纏身，她亦寄語師妹平常心，「做人好渺小，食唔到幾多，隨緣。」採訪：方騫平

馬賽快閃返港，即去品嘗最鍾意嘅雲吞麵。

馬賽曾經風光過，由當年「姐仔」胡杏兒、胡定欣、楊怡等帶住拍劇，因為被爆硬撬富婆Laura牆腳，跟內地有米女製片汪子琦玩斷背，形象插水冇得留低，更令她患上抑鬱症，19年與圈外老公結婚，同年誕下女兒Camellia，一家三口在內地定居。捱過近10年嘅低谷，馬賽已重整人生，演出的內地電影《孤注一擲》更大收30億惹關注。

2019年，馬賽奉女成婚做紀太，一家3口過住幸福生活。

馬賽2019年頭奉女成婚做紀太，老公清楚她嘅經歷，一家3口過住幸福生活。

有女萬事足。

馬賽囡囡好可愛。

馬賽跟黎耀祥合作的《巾幗梟雄3之諜血長天》是在TVB的最後作品。

馬賽當日受捧，跟姐仔鍾嘉欣齊拍劇。

馬賽入行僅3年，便於2011年奪得台慶《飛躍進步女藝人》，而《男藝人》係歐陽靖。

馬賽有份演出嘅內地電影《孤注一擲》獲30億票房。

賣爸爸物業打官司

重提舊事，馬賽好感恩：「26歲時面臨人生第一個大挫折，係上天對我嘅考驗，唔係所有人都可以經歷到，好彩我通過咗，變成一個內心更強大嘅人，因為從大學畢業到選港姐，又拍劇攞獎，太順風順水，未必係好事。」講到遺憾，她說當時年紀太細，太執著外界評價，出售2010年爸爸買畀佢嘅物業套現，然後花近100萬港元跟傳媒打官司，平反不實報道，她慨嘆：「錢就花咗打到調解，最後都得唔到道歉。」

馬賽最後悔為討回公道，變賣爸爸送畀佢嘅物業用嚟打官司。

相信天無絕人之路

今時今日馬賽唔再申訴委屈，她用「大道理」解釋：「嗰件事影響咗大家對我嘅印象都冇所謂，再去澄清亦冇意思，佛家講『忍辱最有功德，最消業障』，凡事有因果，天無絕人之路，做一個善良嘅人，老天會保佑你；如果為人不善，老天都會收。」她更強調，「唔明嘅人講咩都冇用，一切都係因緣，所有事情都唔需要太執著，回頭望，𠵱家不論喺生活、心態、工作都好好，經已係最大嘅得著。」

2014年7月，馬賽於記者會上喊爆，並就自己的不當行為向公眾道歉。

平衡家庭事業時間

提到今屆港姐三甲都多是非，馬賽以過來人身份，寄語師妹保持平常心：「我冇留意港姐新聞，但人生短暫，做人好渺小，食唔到及用唔到幾多，隨順因緣，做一份喜歡嘅工作，過有意義嘅每一日，自得其樂係最好狀態。」她又稱當年突然間受到好多關注，一定有人鍾意及唔鍾意你。又稱人越大，越要穩定情緒再慢慢應對。馬賽趁女兒Camellia入讀幼稚園，除拍戲、做自媒體還經營養生品牌網店，盡量平衡事業和家庭：「好珍惜重新出嚟工作，其實我同TVB關係仲係好好，感恩一直被栽培，如果TVB需要我，好樂意返去報恩。至於目標，希望可以通過自己小小知名度去推廣中國傳統文化，例如中醫養生去幫人。」