古天后日誌｜港股弱勢未改 萬八再失或向下尋底

9月18日，部份時間有陽光，天氣炎熱；日間局部地區有驟雨及雷暴。上周五美股四重期結算表現偏軟，低開低走，三大指數收市顯著下跌，一個星期計算道指微升，標指及納指則微跌，兩指數已連續兩周小幅下跌。市場焦點落為本周聯儲局議息，會後聯儲局會更新經濟增長、通脹率及聯邦基金利率前景預測，為未來息口去向帶來啟示。雖然市場唔少人認為息口已接近見頂，但高息或要持續，最快可能要到明年中先有望減息。

回帶睇睇，20年初疫情全球大爆發，美國緊急QE放水近5萬億美元，以助企業低息發債渡過難關。但唔少當時低息發嘅債券，經過三年已陸續到期並步入再融資階段。美息經過多次加息後，唔少企業債務嘅息率已超過6%，個別垃圾債券再融資成本更高見10%或以上，留意高收益債券嘅違約率已由3.2%升至3.4%，預期明年第二季違約率或升至5%。

根據EPFR Global環球資金流向，截至上周三全球股市錄得253億美元資金淨流入，係18個月高位，更多資金為明年減息而投入股市。年初至今，貨幣基金及美債成為資金避難所，其中美元貨幣基金便錄得超過1萬億美元淨流入，呢1萬幾億美元資金流向，將影響環球股市之後走勢。

恒指走勢偏淡格局未變

至於內地方面，上周五公布三頭馬車數據，8月份工業增加值及零售表現勝預期，但固定資產投資數據卻持續不振，A股上周衝高回落，全周微升1點，收報3,117點，3,090點支持位不容有失，暫時A股仍偏弱，回調趨勢未變。而人民幣持續疲弱，亦影響到資金對內地股市嘅投資意欲。

返嚟港股呢邊，恒指上周仲守住18,000點大關，但多項技術指標均表現欠佳，加上成交仍然薄弱，即使周五見過千億成交額，亦只不過係富時指數進行rebalancing，實際入場買港股嘅資金少之又少。恒指走勢偏淡格局未有實質改變，夜期隨美股回落，莫過話20天線失守，10天線變得更為遙達。黑期今早跌200點，恒指又重返18,000點關口爭持。留意萬八關一旦失守，17,800點關口重要支持不容有失，否則向下尋底成必然之路。即市阻力仍是20天線約18,175點，要重拾升勢至少收市企穩，並重返10日線即18,238點水平，港股方有機會扭轉目前弱勢。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ