頭條戲場丨《請問，還有哪裡需要加強》春風唔該拍多啲戲

2023-09-04 08:00

電影改編自九把刀小說《精準的失控》的第四章「這是我要的感覺」，是繼《那些年，我們一起追的女孩》後，九把刀的第四部電影，由當地Hip Hop天團「玖壹壹」的春風首做男一，飾演霸氣又有義氣的社團大佬泰哥，跟宋芸樺飾演的大膽洗頭妹阿芬，發展一段鹹酸浪漫情緣。電影屬典型台式喜劇，有大量台語兼數唔到咁多笑位。重點推介春風，打打殺殺夠狠，發姣夠甜，輕觸式演技睇到人心癢癢，表白春風，唔該拍多啲戲。(上映中) 撰文:廖思慧

阿芬都好冧泰哥，主動邀約上床。

宋芸樺難得性感，好珍貴。

泰哥同大佬被埋伏，後者死亡，身受重傷的前者衝入阿芬的舊式髮型屋，多得阿芬，泰哥逃過一劫。為報答救命之恩，泰哥交代所有幫派小弟奉獻頭髮，等剪髮功力負數的阿芬實習。導演九把刀說：「這是一部關於大家都想要談戀愛的故事。」社團大佬遇到有義氣良家婦女極速沉船，追女招老土但好好笑，情感表達反差之大亦非常「中二病」，特別是春風跟宋芸樺的合作，橫睇掂睇都非常唔襯，但化學作用好強，都係嗰句，麻煩春風拍多啲戲。

為報答阿芬，泰哥搵佢剪頭髮，一剪就嚇親。

泰哥出巡，兄弟髮型全部由阿芬處理，除咗柯震東。

泰哥讀書時是棒球隊隊長，知阿芬鍾意睇棒球，所以陪打。

(左)百白飾演阿芬的髮型屋同事阿娟，負責搞笑。

考古港星周群達
睇開九把刀都大約知佢講故事及執導功力，台式喜劇都係咁上下，務求用一堆笑料餵飽觀眾，要笑又要有深度，呢套未必啱你。戲中大玩打破第四面牆跟觀眾對話，又有唔少致敬經典港產片場口，加上九把刀班底柯震東及蔡昌憲等出盡力搞笑，又識得玩meme，玩「中二病」玩得出色都唔容易。特別一提飾演泰哥老友東莞哥的周群達，原名黎登勤，前香港滑浪風帆隊的代表，香港滑浪風帆奧運金牌得主李麗珊的表弟，29年前入行，拍過《I Do戀性世代》，戲中廣東話粗口之多之狠勁之入肉，睇三級港產片都未感受過，好特別嘅觀影體驗。