獨家丨George唔排除同姐姐拍拖：大10年都得激讚「好家姐」Yanny助入戲

2023-09-04 07:00

George（歐鎮灝）@P1X3L和Yanny（陳穎欣）在ViuTV新劇《那年盛夏我們綻放如花》首度合作演姐弟，兩人開心過足姐弟癮。George好識做，稱多得「好家姐」細心幫手入戲，而一直覺得自己好廢的George，唔信獲男一機會而反問經理人「導演係咪cast錯人」。採訪：杜杜攝影：羅安強髮型:Calvin Tsoi @HaiR(Yanny) 化妝:King Yip @Kingsmakeup(Yanny) 服裝:Claudie Pierlot(Yanny)、Sandro Paris(George)

George和Yanny都覺得兩人白淨又眼大，做姐弟都算似樣。

Yanny話George平時唔多出聲，睇得出他有壓力。

恨有靚家姐嗲的George，遇到Yanny滿足晒。

劇中George飾演的「何晞賢」怕事又冇自信，知道導演陳健朗揀他全因自己廢亦相當認同，更笑言：「係呀！廢呀！」最離奇得知被選中竟然唔開心，還質疑導演搞錯，「第2次試鏡，我覺得自己做得好差，都未必中㗎啦，點知一嚟就話你做呢個角色啦，跟住我問可唔可以問吓導演有冇搞清楚，有冇cast錯人，我真係咁樣同經理人講，後尾問返導演佢都話係試鏡好差嘅，又唔係唔開心，但純粹係緊張。」

「何晞賢」細膽又冇自信，跟George性格最相似。

「何晞媛」是網台記者，做事頗求其。

「家姐」出手助「細佬」

Yanny和George合演姐弟過程愉快，Yanny讚24歲「細佬」朝早要興奮拍綜藝，下午沉重演戲一樣應付到，「我都好佩服，作為演員都好想投入角色，但咁樣分心，個人嘅彈性要好高，咁嘅年紀可以做到咁真係唔簡單，都真係好叻，畀啲掌聲自己。」George就開心遇到夢想中的「家姐」，「佢好有氣質好靚，做戲好好，我係阿哥嚟，好渴望有家姐，佢係我想像中嘅家姐。」

George俾「家姐」當面讚，怕醜得嚟又好冧。

Yanny和George飾演感情要好的姐弟「何晞媛」和「何晞賢」。

George激讚「家姐」戲裏戲外都很照顧他，更跟他分享拍情緒戲入戲秘訣，「佢講得好detail，Yanny小技巧，Yeah！我有。」Yanny稱當時睇到「細佬」超緊張，就決定出手，「我都經歷過，知道自己驚乜位，就話畀佢知唔使驚，分享咗一啲小秘訣，我話我淨係話畀佢聽㗎啫，好少同人講，但係佢係我細佬，我一定要幫佢。」George就坦認冧姐姐，唔排除同姐姐拍拖，「幾多歲真係冇乜所謂，大10年都得。」