獨家丨林夏薇激讚周嘉洛係筍盤 識睇眉頭眼額又有擔當
2023-08-23 07:00 
36歲林夏薇跟28歲周嘉洛無論現實還是劇集《寵愛Pet Pet》中，同樣相差8年，女方最初擔心溝通唔到，結果現實比角色更快「撻着」，話咁快friend咗，更約定下次拍檔唔賣「甜寵」，要玩忠奸對立過戲癮。採訪：杜杜 攝影：譚志光 髮型:hairculturehk seiko(薇薇) 化妝:江中平(薇薇) 場地:Studio Meta
薇薇對於跟嘉洛合作冇乜信心，「雖然同佢唔係差好遠，但合作開嘅對手都比較年長，慣咗嗰個模式，唔知同年輕一代合作係點樣。」另外，薇薇對姐弟戀亦有點抗拒，「我鍾意比較成熟穩重嘅感覺。」不過她說私底下的嘉洛很成熟，令她改觀，「我拍攝時已冇擔心，觀眾跟住劇情發展，會鍾意我哋呢pair，有人話似韓劇《經常請吃飯的漂亮姐姐》，呢套劇的愛情浪漫細節位，絕對唔會輸畀韓劇，我哋都度咗幾多感動又浪漫嘅場口。」
嘉洛唔介意對象大20年
嘉洛曾跟大幾年的對象拍拖，對跟姐姐相處有信心，「年齡對我嚟講唔影響愛情，只要當下感覺，其他嘢夾到，大廿年都冇問題，外表大家最終都會皺皮。」講到跟薇薇相處，他大賣口乖話唔覺相差8年，「有時覺得自己大過佢，佢好佻皮，又跳跳紥紥咁。」薇薇就讚嘉洛好善解人意，「佢好識得睇眉頭眼額，我都懷疑佢係咪識得讀心，筍盤嚟，又有擔當，真係隆重推介。」嘉洛就笑着向薇薇解釋：「我唔係個個都睇到，但係你太容易理解，拍攝時佢有猶疑唔出聲，我已經知佢有唔妥，因為佢平時好爽快。」
兩人合作愉快，私底下亦有聯絡，嘉洛仲話會遷就恨演反派復仇角色的薇薇，「如果佢想演反派，我一定演忠，咁樣先可以多啲對手戲，做對手好玩過同一陣線，我想我哋都咁好玩。」薇薇就相信願望成真，「喺訪問許願就會有，好似我話好鍾意做律師，《法言人》就做到。」
《星島頭條》新網站有更多精彩內容：http://www.stheadline.com/
最新回應