專欄│女狂牛難望再刷好運卡
2023-08-20 08:00 
女子世界盃不知不覺已經嚟到決賽，「女狂牛」西班牙會硬撼「女三獅」英格蘭。
講搓波組織，西班牙的確技高一籌。不過，艾爾之前道出過球隊體能消耗嘅問題，上場對瑞典「舊病復發」。
「女狂牛」81分鐘千辛萬苦領先一球後，再次抵受唔住對手突然加強嘅壓逼，同埋陣式上嘅轉變，7分鐘後就被追和。唔係隊長卡芒娜補時挺身而出，喺禁區外遠射得手，分分鐘要打到加時甚至互射12碼，先分到勝負。西班牙上場嘅缺點無乜改善到，贏波有一定幸運成分，呢張「好運卡」真係可以擦到最後？艾爾不敢苟同喇。
佢哋今場嘅對手英格蘭晉級過程都唔算輕鬆，但今屆「女三獅」喺領隊域雯嘅調整後，真係有進步。以往英格蘭打開4後衞陣式，今屆世界盃轉打3中堅陣式，進一步解放翼衛邦朗絲同瑞秋戴莉嘅邊路進攻能力。一對箭頭蘿倫希普同蘿素嘅配合越嚟越好，尤其蘿倫漢普狀態逐步提升，加埋蘿倫占士停賽後復出，英格蘭多返進攻點，對西班牙有一定威脅。
兩隊都係第一次殺入決賽，呢場相信會係一場幾緊湊嘅終局之戰。不過，艾爾相信域雯嘅執教功力，可以為英格蘭攞到第一個世界盃冠軍。艾爾
-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應