獨家丨黃浩然導演為寫劇本送上門俾人呃 被指擅長拍低成本作品環境逼成

導演黃浩然繼去年電影《緣路山旮旯》後，再有新作《全世界都有電話》，內容大部分為導演親身經歷，為攞電話詐騙過程資料寫劇本，更專登俾騙徒呃1000元。擅長拍低成本作品的黃導演，坦承環境所逼，若資金充裕最想拍太平天國，因這歷史題材有趣兼可用廣東話拍攝。採訪：杜杜 攝影：羅安強 場地:90sLazy

黃浩然估計拍太平天國要過億製作費，悲觀認為可能一世也未能實現夢想。

黃浩然一直很想以電話題材拍電影，還將自身經歷化成劇本。

黃導演一直很想以電話為題材拍戲，因手機同現代人生活息息相關，觀眾容易有共鳴，而戲中大部份橋段都是導演的親身經歷，「先有唔記得帶電話出街，跟住中學同學個電話俾人hack咗，騙徒搵我傾咗一日，我將成個過程，遇到啲人嘅反應照寫出嚟。」不過他發覺兩個經歷未夠拍成電影，於是諗到送上門俾騙徒呃來攞料，「要有3條線先夠拍套戲，我為加速件事，聽聞某個app入面全部都呃人，就去搵人傾偈，好快就出現咗戲裏面嘅情節，我擺到明俾佢呃1000蚊，將啲手法同對白畀編劇照抄，俾佢呃有個免費劇本都好抵呀！」

黃浩然跟戲中飾演父女的陳湛文和麗英討論劇情。

周國賢角色以黃浩然為藍本，不單造型似，連間屋都是導演借出。

周國賢角色以黃浩然為藍本，不單造型似，連間屋都是導演借出。

以年齡為選角基礎

黃導演以年齡作為電影選角的基礎，最終搵了周國賢、韋羅莎和陳湛文演出，「如果佢哋1997年高中畢業，買第一部手提電話，講佢哋25年後再見，一計就計到佢哋41歲，所以我哋就睇41歲有咩演員，佢哋3個人年齡相差唔夠1歲。」黃導演認為角色經歷的事，演員本身都經歷過對演出有一定幫助，「佢哋都係90年代尾買人生第1部手提電話，好容易有共鳴，同年代嘅人亦好容易溝通到。」

黃浩然專登搵同樣41歲的周國賢、韋羅莎和陳湛文主演。

韋羅莎跟騙徒的對話內容，是黃浩然親身經歷。

對於被指是擅長拍低成本製作的導演，黃浩然坦認是環境逼成，「我唔係杜琪峯喎！我都想拍億億聲，但未到嗰個level咁咪拍呢啲。」若然不用理資金，他最想拍太平天國題材，「洪秀全係廣西人嚟，佢哋成班人都係講廣東話，同埋有趣嘅係，佢哋跟過神父吸收過一啲天主教文化，再扭曲變成一個新宗教出嚟，好少數中國歷史故事，都會吸引到西方社會。」

去年的《緣路山旮旯》口碑極佳，但未有令他有更多資金拍戲。

《星島頭條》新網站有更多精彩內容：http://www.stheadline.com/