星8卦｜「微微」靠男人上位飛「型仔」被唱一拍兩散

2023-08-18 11:30

「微微」最近完全唔見人，因為真係遇到一個自己收服唔到嘅男人，仲非常傷心𠻹。自細「微微」就好有男人緣，話說第一份工就搞到兩個男神為佢大打出手，結果佢無事，仲可以越做越上位，其實係男上司對佢生滋貓入眼，心存偏袒亦十分有私心。

之後「微微」想轉型，即刻搭上「型仔」，將佢大改造變咗另一個人，事業亦一帆風順。好多人都話「型仔」係貴人，但佢亦好識使錢，喺埋一齊嘅幾年，「微微」搵到好多，「型仔」亦使得好疏爽。有人去過「微微」屋企，打開衣櫃一睇，全部都係「型仔」嘅靚衫，件件過萬，反而「微微」平時着嚟着去都嗰幾件，現實生活好知慳識儉。到自己企穩腳，「微微」又去撻着另一個製作人，「型仔」梗係唔忿氣，於是周圍唱「微微」姣又騷，借男人上位。

不過製作人性格比較怕事，幫咗「微微」一陣就即刻自己提出分手，話頂唔順壓力，「微微」從來都係對男人有十成把握，個個都愛到要生要死，今次俾製作人飛，心理上真係過唔到，無面係最大原因，最慘已經俾「型仔」唱到形象好差，而家仲要做埋愛情輸家，一心諗住可以靠實力重拾江湖地位，但無咗可以幫自己嘅靠山，唔收埋一陣又點見人呢！