古天后日誌｜阿爺打嘴炮救經濟未能解決債務問題

2023-08-14 10:47

8月14日，大致多雲，有幾陣雨，局部地區有狂風雷暴，日間短暫時間有陽光及炎熱。上周五（11日）美國公布PPI好過預期，美股低開但靠穩，道指更升105點收市；標指跟納指則分別跌4點及93點。空軍喺上月完成大量冚倉盤後，美股高位未見有買盤高追，但亦未見嚴重沽壓，只係個別科網股累計升幅太大，資金輪動轉向落後股份，令美股喺高位牛皮。VIX上周一度升至17危險水平，但周五回落至15樓下收市，反映目前高位未見有恐慌拋售，反而喺高位徘徊，留意標指支持4,400能否守住。

美國近日房價跟房租價格回升，PPI喺跌咗16個月之後，低基數效應之下見升，由6月時0.26%反彈至0.85%，較市場預期的0.7%為高。除咗美國PPI回升外，中國PPI亦結束為期22個月下跌週期；此外，美國ISM製造業PMI亦從46反彈至46.4，呢幾個係工廠復甦重要指標，但留意美國PMI仍處於50之下，距離再次擴張嘅50以上仍有一段距離。至於內地財新製造業PMI一直喺榮枯分界線50附近上落，近一年中國出口歐美訂單持續下跌，中國出口已經是連續3個月出現負數增長。目前美國零售商庫存已七七八八，來自歐美訂單可望喺下半年慢慢回升，按估計要待美國PMI回升至50，先可以話擺脫最低潮。

內地上周五有消息指，阿爺擬推1萬億地方再融資債額度，主要是為防止地方債崩潰，豈料碧桂園（2007）尋日宣佈今日起有11隻債券停止買賣，估計要同債主商討債務重組。集團表示希望30日內能完成債務重組，碧桂園自稱仍有3,000億元人民幣淨資產，實際上所擁有的1.2萬億元3、4線地皮仲值唔值錢，大家心中有數，碧桂園難聽啲講已陷入負資產狀況。

中融信託爆煲與恒大有關

市場焦點都放咗喺碧桂園身上，可能未有留意，內地最大的資產管理公司中植系，週末宣佈旗下中融信託停止出金，其規模達3,500億元，資產達6,000億元。中植系一直跟恒大關係密切，今次出事應該是無法取回恒大票據。假若碧桂園又賴債，有機會出現中植2.0、3.0事件。目前內地營商環境相當惡劣，融資成本高，連最大傻仔軟銀都無錢再投資，燒錢搶市場經營模式破滅，一堆公司只能減價作最後垂死掙扎，目前內地各行各地都在內鬥，除非再有大量外資湧入，否則內地嘅債務問題，只有繼續爆發，更一發一可收拾，阿爺再三出口術，若未見真金白銀入場，嘴炮救經濟，市場只有更唔信任，資金只有走得更快。