專欄｜PSG無名宿現象 麥巴比又抵可憐？

一個夏天轉會窗，巴黎聖日耳門先有美斯離隊，再有基利安麥巴比唔肯續約，近日連尼馬都遞信話走人，令人聞風喪膽的MNM組合已成歷史。卡塔爾資金建立的超級巨星計劃得到一個頗為失敗的答案。未能贏得歐聯冠軍是否失敗，見仁見智，曼城都係剛剛先贏到啫，但我認為最失敗的，是未能真正留下「名宿」，完全建立唔到豪門底蘊；每位曾効力巴黎的巨星都只是過客，要不就係不歡而散。唔計MNM，朗拿甸奴、伊巴謙莫域、碧咸、泰亞高施華等世界頂級球員，在離開後，幾乎對前東家莫不關心，甚至唔講壞話已算唔錯了。

要令曾効力的球員全無歸屬感，難度其實都好高，難聽講「養隻狗都會有感情」。從呢個現象可以調轉頭質疑PSG的班主和管理層或許真係做得太多衰嘢，主席艾卡里法過往有不少負面傳聞，甚至被控告過使用綁架、禁固、恐嚇等手段，搵水軍攻擊包括美斯在內的「敵人」。連帶今次麥巴比事件，唔少球迷都覺得巴黎聖日耳門唔抵可憐。然而，我有一半都覺得係報應，但單獨事件去睇，PSG對麥巴比，就好似一間供你進修，出人工又高的公司，但你讀完個PHD就走人，然後話「我都係按合約做嘢啫。」你仲幫得落? 推介巴黎聖日耳門對家，羅連安特的讓球下盤。馬高

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ