獨家丨陳湛文驚訝兩歲囡囡識用遙控 同麗英靠動漫培養「父女」感情

40歲陳湛文（Peter）和25歲麗英在新戲《全世界都有電話》首次合作，演一對關係極差的父女，更有火爆鬧交戲。雖然戲內火藥味濃，但戲外兩人靠動漫好啱傾。麗英笑言現在是她的反叛期，跟父母有好多拗撬，而已為人父的Peter以戲中跟囡囡的關係作為借鏡，希望未來父女關係冇咁差。採訪：杜杜 攝影：朱偉彥 化妝及髮型:Hulda Tsai(麗英) 化妝:Lisa C. Makeup Art(Peter) 服飾:CLUB MONACO、eye’s Buddy、New Balance (Peter)、 HBX Hong Kong

Peter和麗英被指有父女相，兩人都認同眼細細最似。

訪問期間Peter不斷諗將來跟囡囡的關係，直言越諗越驚。

平日形象串嘴的麗英，聲稱現實是個乖乖女。

麗英以為「爹哋」內歛又嚴肅，識落才知Peter為人好搞笑，「最加分係佢會同我傾動漫，仲會聽日文歌。」Peter是動漫迷，疫情時上網狂睇片才認識麗英，「麗英翻唱動漫主題曲，仲唱到個動漫魂，所以我哋第一次見面，傾開有咩會吸引我去睇嗰套動漫，就係主題曲。」四十出頭的Peter完全唔介意戲中有咁大個女，「不知幾開心，終於唔使再演啲廢宅毒頹，仲係事業有成，為個女去打拼，同埋我拍之前個ig真係俾啲釣魚程式hack咗，所以唔使點做功課，可以如實呈現個感覺。」

Peter同麗英這場父女鬧交戲，令他反思很多。

這場戲麗英除了要鬧Peter，仲不斷掉嘢，更差點誤傷對方。

麗英細個唔敢駁咀

兩人在戲中關係極差，一碰面就嗌交，麗英就話讀書時不敢頂撞父母，「我嗰時反而唔反叛，最多係呃媽咪話去溫書其實去玩，父母話咩都唔敢駁咀，好驚俾人鬧，𠵱家我仲反叛啲，佢哋有啲諗法唔啱，我會同佢哋拗！」而有個兩歲囡囡Nina的Peter，坦認角色令他反思很多，「係個好好嘅借鏡，畀我預早演習，套戲經歷咗，現實唔好再經歷嘞，哈哈！」Peter認為現在的小朋友成長得太快，好怕自己跟不上，「做咗父母先發覺，有時真係會後知後覺，好似阿女唔知幾時學識，會攞個搖控畀我，再指住個電視不停話『睇』，我同太太都冇教過佢，所以希望跟到佢嘅步伐，跟唔上嘅希望佢有耐性同我講返，你已經快到咁樣。」

Peter讀演藝時已夢想跟師姐韋羅莎合作，所以今次演出令他相當享受。

Peter估不到兩歲囡囡，比他想像中大得更快。

 

《星島頭條》新網站有更多精彩內容：http://www.stheadline.com/