禁冷氣嘅秦始皇？林超英自稱非死硬派：生存係第一條件︱Kelly Online
2023-08-06 22:13 
曾明言「如果自己係秦始皇，一定禁冷氣」嘅天文台前台長林超英，出席網上節目時再一次回應網民關於「開唔開冷氣」嘅疑問。林超英強調，自己唔係死硬派，生存係第一條件，自己亦都唔係「絕對主義」，會面對現實，笑言「如果知道自己會死，梗係會開啦。」
冷氣開幾度？交幾錢水電費？
林超英素有「環保達人」之稱，唔開冷氣嘅習慣街知巷聞，對於佢幾時會開冷氣，如果開又開幾度，網民都好好奇。林超英指，自己一早講過，客人嚟有需要就會開，好似孫女嚟咁，會按佢父親要求開，但佢哋走咗之後就會熄。咁冷氣開幾度？林超英話：「27度。」
天時暑熱連冷氣都唔開，咁電費咪好平？林超英話，自己交0蚊電費已經3年幾，就算水費都只不過係10幾蚊。至於點走上「節約之路」，林超英指自己做天文台台長嗰陣，氣候變化成為無可抗拒嘅事實，自己早年都唔知氣候變化，但去到2000年睇到數據嘅時候就無可爭辯。
「我都會怕熱，但接受出汗呢個事實」
林超英話，佢都唔係一開始就完全唔開冷氣，係逐步逐步嚟，去到今時今日已經有十幾年完全唔開冷氣。佢質疑好多人根本無經歷過無冷氣嘅年代，而家只不過係變返原始起點。不過，佢都明言自己都會怕熱，但佢接受出汗呢個事實。
林超英係節目入面都講出一個令人震驚嘅習慣，就係佢一條褲竟然可以著成個月。佢咁解釋：人流汗通常都係集中喺上身，下半身都唔會出汗，呢個係生理結構。佢仲話自己係「用科學原則指導自己嘅生活」。
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應