獨家丨Lolly Talk組公司半年每人賺6位數成軍1年捱過零收入拒跟大公司簽約

2023-08-04 07:00

成軍1年的Lolly Talk（簡稱LT），早前舉行fans meeting慶祝，8個女仔由頭喊到尾，全因由最初零收入，到半年後每人各袋6位數，畀到家用兼交到學費，冇簽大公司的LT半年前更自組公司，自己話晒事的她們打算年底舉行首個演唱會，目標5年內踏上紅館舞台，成件事好熱血。採訪：杜杜攝影：羅安強場地:ROOOT

LT有個好遠大目標，就是擁有以「LT」命名的大樓，「上層做酒店，樓下每人負責一層開自己店舖。」

LT分別由《造星IV》的劉綺婷（Yanny）、曾美欣（MeiMei）、黃敏蕎（阿妹）、黃詠霖（阿蛋）、郭曉妍（Ah Yo）、鄭芷淇（Elka）、陳紀澄（Tania）及吳倩怡（Sinnie）組成。2021年12月，8人只打算開頻道同粉絲分享，到2022年4月推出首支團歌《8SEC》，因為反應唔錯才考慮正式組女團。Sinnie說：「有機會畀我哋出到歌，先至諗係咪要繼續做。」8女去過staycation了解大家後，阿妹稱已經唔想分開。LT合作1年從未嗌過交，早前去台灣拍MV感情再升溫，「之前成日講笑話解散，去完返嚟就冇再講！」

搵錢最多的18歲阿妹，「由唔識跳舞，到依家好enjoy好鍾意，多謝fans陪伴。」

25歲Sinnie，感恩得到好多人幫助，「冇你哋唔會去到𠵱家嘅位置。」

爆阿妹最多Job

2022年7月，LT推出首支派台歌《三分甜》正式出道，MV在1個月內獲100萬點擊，之後立即有大公司邀加盟，Sinnie稱團隊用咗10分鐘開會，最後推卻好意。雖然往後仍有公司聯絡，她們決定獨立發展，Elka解釋：「自由度大啲，可以自己揸主意。」去年底，LT決定自組公司做老闆，還請了兩個全職及多位兼職員工，均是起初已湊住LT的朋友，包括經理人，Sinnie興奮表示，「所以係我哋出糧畀人㗎！哈哈！」她們稱成軍以來冇統計過支出，組公司資金亦冇再夾錢，Sinnie說：「我哋之前儲落一筆收入，去成立公司幫我哋營運，好難自己做埋。」

20歲Tania以突破形容這一年，「希望嘗試更多新嘢再突破自己。」

20歲Elka覺得這1年如發了場夢，「所有嘢都好唔真實。」

LT承認成軍初期收入好唔穩定，阿妹說：「呢個月做嘅嘢，幾個月先至收到錢，零蚊都試過。」問到1年的接Job成績，8女即時頭痕，Sinnie笑言：「慘嘞！呢度全部都係數學差嘅人，哈哈！」阿妹估有廿個以上，Sinnie笑指，「你囉！」大家即起哄，Sinnie再爆料稱阿妹最有錢，又稱阿妹多Job對公司都有着數，因會抽佣，成員作為股東都有錢分，Sinnie終極一爆：「我哋MV嘅錢，阿妹出得最多，多謝！」阿妹開心回應：「LT一條心冇問題。」

30歲MeiMei認為出道是將不可能變可能，「未來會將呢個精神延續。」

24歲Yanny感激波板糖（粉絲暱稱）支持，「令我哋8個女仔有神奇魔力。」

唔同COLLAR比較

Sinnie稱公司成立半年，LT至少接了20個工作，「我哋好好彩，每次出完歌好似《三分甜》、《五種愛的密語》後，都會有騷搵我哋，1個月兩、三次，好忙，好鍾意咁充實。」成員都笑言數口唔好，所以成立公司後有請會計師幫手，總算知道半年有幾多收入，不過阿妹都係計錯，「都應該有5位嘅。」Sinnie更正，「每個人應該差唔多上到6位。」 Yanny開心表示可以畀到家用， Ah Yo和Tania就交到學費。

21歲阿蛋稱LT被發掘了很多不同面向，「未來會呈現更多畀大家睇。」

18歲Ah Yo覺得成員的默契和友誼都昇華，「又冇諗過會有咁多fans支持。」

LT越來越受歡迎，負評亦有不少，有網民以「雜牌軍」形容她們，水準未達標似中學生組合，難得她們唔介意，更會自我檢討。18歲的阿妹好識諗，「做好自己，鞭策多啲自己，如果我有畀心機去做，肯定會進步，呢個就係自信嘅來源。」隊友大讚她心態正確。至於被指聲勢較同期出道的COLLAR更好，LT認為大家都是一齊追夢的朋友，不會拿來比較，阿妹反而覺得好熱血，「大家都係香港嘅女子組合，一齊去奮鬥。」