55歲江榮暉名校出身背棄家人期望 演員身份至今未獲認同：覺得我未夠班
2023-08-02 13:30 
55歲江榮暉入行36年，曾參與過經典劇集《蓋世豪俠》、《卡拉屋企》、《巨人》、《愛·回家之開心速遞》、《黯夜守護者》、《美麗戰場》以及《飛虎3壯志英雄》等作品，雖然角色未必是主角人物，但有不少令觀眾留下深刻印象，可惜始終未能令他的事業更上一層樓。最近江榮暉接受演藝人協會的訪問，他坦言家人至今都未有認同演員身分：「覺得我未夠資格成為一個出名嘅藝人！」
【相關閱讀】：美麗戰場｜蔣家旻演技爆發！父心臟病發阻搶救 眼神兇狠親睹杜燕歌失救致死
【點擊睇江榮暉背景】：
江榮暉小時候曾就讀喇沙小學及喇沙書院，本來父母一心希望兒子成為一位律師，安排他去英國寄宿學校讀書，殊不知一次暑假返港，竟改變了江榮暉的命運！原來他瞞住家人報名參加《超級新星比賽》的招募，雖然未能入圍，但無綫問他有沒有興趣讀訓練班：「呢期訓練班係好特別，係冇對外招生，只係安排畀參加《超級新星比賽》嘅嗰班人參加，仲有啲內部嘅人，好似有崔嘉寶、梅小惠、韓毓霞、李中寧同郭富城。」江榮暉在畢業前已後已經被安排在《城市故事》飾演吳孟達兒子，當時獲傳媒讚賞：「嗰陣諗住公司會睇到，點知原來係冇，咁我唯有繼續努力。」幸好當時工作量不俗，與林敏驄和杜德偉在《點解咁好笑》拍趣劇。
不過多年來發展不大，江榮暉在1997年離開無綫，轉攻馬來西亞發展：「嗰陣走嘅時候，公司想我拍完《鹿鼎記》先離開，但係我拒絕咗，因為我應承咗人哋去馬來西亞拍劇，嗰陣去到係做主角，但係我唔會覺得自己好勁，因為我都唔係喺TVB主角，所以根本唔係主角，唔可以自己呃自己。」他又稱離開還有另一個原因：「嗰陣我有段姻緣，諗住搵多啲錢，睇吓有冇機會結婚組織家庭，咁啱1997年金融風暴，冇乜人開戲，周圍搲嘢做，不過真係好難，因為啲人話我唔紅。」
江榮暉有一段時間與朋友合資做貼紙機生意，間中會去馬來西亞拍劇：「跟住有個機會見到珍姐（曾勵珍），佢問我想唔想返嚟，點知佢哋用番1997年嗰份合約嘅人工同我傾，嗰份人工9年前喎，真係啃唔落，覺得即係欺壓我啫！」當時不少舊同事都力勸他先跟無綫簽合約，最後江榮暉續說：「係，真係追得番（薪金），追得好快添！就咁返番無綫！」
成績欠佳對老師深感歉意
重返娘家後，江榮暉遇上昔日訓練班老師，他對老師深感歉意：「對唔住，老師，我辜負咗你，我哋成班同學，全部都做晒主角，除咗我做唔到，我諗我呢一生好似智叔，應該行佢條路，可以全面啲！」有一段時間指他轉行做夜間清潔，江榮暉表示要澄清，「其實我喺山頂做咗一晚，原因係因為當時我拍處境劇《誰家灶頭無煙火》，慶功宴擺咗好多圍，監製話我做得好，仲話下套處境劇預埋我，當時我好開心，但係最終冇我份，係好唔開心，咁啱嗰晚有朋友打畀我，我朋友做清潔，嗰晚佢喺山頂開工，咁我當時好唔開心，好悶，我話跟佢做清潔，一心只係想散心，咪跟佢喺山頂做咗一晚清潔，我冇放棄過做藝人呢個職業。」
江榮暉多年來很努力做好每一個角色，主要原因是因為家人，他說：「屋企人冇認同過我，有時我好妒忌一啲演員，佢哋會帶父母去電視城參觀，佢哋啲父母好開心，但我屋企人唔係，佢哋覺得我未夠班，未有資格成為一個出名嘅藝人，所以佢哋冇認同過我，我試過叫屋企人去電視城睇我拍戲，佢哋搖晒頭，好坦白話我未夠紅，到今時今日都係一樣，我媽話我做戲差，所以我要繼續努力去做我呢份職業，我冇放棄過！」
【其他閱讀】:
美麗戰場｜「老屎忽」江榮暉外型爛仔原來係名校生 鍾保羅幫佢改花名叫光明頂？
「譚道德」陳榮峻談做藝人辛酸！內地開工十日等於TVB一年人工 曾棄演男二寧炒散賺外快
TVB六大最強綠葉王！群姐英文超強拍過西片 御用道友陳勉良係國畫大師
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應