獨家丨蔚雨芯被網民屈靠富貴舊愛發達谷鬼氣 怒斥網媒報假新聞：唔求證就照抄
2023-07-27 07:00 
下月30歲的蔚雨芯（Rainky）入行11年，在TVB拍了9套劇，最近終憑《靈戲逼人》的電台DJ「Karen」一角首度被讚，令她開心到喊。雖然跟TVB還有幾個月約，美容生意又愈做愈大，但她明言唔會放棄演藝工作。因為4年前榮升老闆娘，Rainky生活變得富貴，被指外貌進化，她大方承認有打美容針保養，但對於被港式內容農場的網媒老屈靠男人發達，強調搵錢靠自己的她嬲到要發聲明澄清，「冇記者訪問過我，就一間抄一間！」Rainky怒斥網媒歪風，見到網上傳聞冇盡傳媒責任去求證採訪，非常唔應該。採訪：杜杜 攝影：Stanley 場地:Glasshouse Greenery (Victoria Dockside K11 Musea)
Rainky去年拍《靈戲逼人》時，撞正美容院籌備開張，雖然有用心拍，但冇預期有好反應，「11年嚟第一次獲觀眾有少少肯定，見到新聞感動到喊出嚟，冇諗過仲有幾個月完約，上天會畀粒糖你囉！」她認為得到觀眾讚賞較攞獎更開心，「話爆喊係演技大爆發，又話希望我提名女配角，全部正面說話，入行到𠵱家仲係『魔鬼胸』，性感、靚呀，其實聽到好厭，奈何真係冇一個代表作去洗咗呢啲嘢，觀眾嘅肯定真係重要過攞到獎。」
願意為角色剃光頭
跟TVB快將約滿，Rainky承認公司有搵她傾，《靈》劇反應好亦令她心態有轉變，「始終呢個平台由我入行到𠵱家都畀咗好多機會我，令觀眾認識我，留返喺度發展或者離開，都唔會放棄拍戲同唱歌。」Rainky好想挑戰自己，願意為角色犧牲，「我唔介意為有癌症嘅角色剃光頭。」不過她亦明白，今次可能只是虛火，「大家呢刻鍾意，可能3個月熱潮就過咗，要睇一個人努力需要好長時間，有啲人好好彩一套戲或者一隻歌去到某個位，我係要浸返嚟，觀眾對號入座，先天外表覺得我係咩類型嘅人。」
2019年6月，Rainky與小學同學楊曉婷合資近百萬元建立品牌「ScR sincera」，售賣女性保健用品，生意愈做愈大更開埋美容院，年前與家人搬入小欖逾2500呎的獨立屋，由於她曾上載會所露天泳池取景拍攝的性感相，被口痕網友指忽然富貴，全因有位馬來西亞籍「富二代」鄭姓舊愛，對被老屈靠男人發達兼影響到家人，Rainky嬲到即搵律師出聲明以正視聽，「一定要否認就係話我屋企所有物業，或者我所有嘢，我細佬架車，都係嗰個人，我要同屋企人平反，媽咪爹哋見到唔開心，親戚會問點解個女會俾人咁講，點解將呢啲嘢對號入座晒呢？！出咗聲明有人信有人唔信，我會用時間證明畀大家睇！」
Rainky又怒斥現在網媒歪風，見到網上傳聞冇盡傳媒責任去求證，只識得一間抄一間，「冇任何記者訪問過我係定唔係，跟住一間出咗copy 第二間、第三間，跟住網絡就瘋傳，嗰時又疫情，好少公開活動又搞緊生意冇人問到我，啱啱呢個劇出咗，我就可以講返事實。」她承認曾為假新聞唔開心，但現在已學識睇開啲，「有谷鬼氣，但最緊要自己生活得好，唔好理人哋講咩。」
唔亂打針怕變膠面
Rainky作為美容生意老闆娘，被形容外形「進化」不怒反笑，「唔介意，我做醫學美容生意，梗係會打吓針啦！同埋我真係好努力做運動，令到皮膚唔會下垂。但我都唔贊成開刀，好大風險。」問到打針部位，她就笑言，「呢個就唔講嘞，你嚟我美容院話你聽，商業秘密，哈哈！全部我要打嘅地方都會打，唔應該打嘅地方唔會打，因為唔想塊面係膠同硬囉！有時打針唔係微調或者加工，打保濕針好似一次過敷咗10塊面膜，我係將20歲樣貌保養落嚟，但唔好over囉！」
快將30歲的Rainky，有錢有樣有身材，拍拖次數竟然一隻手數得晒，早前了解過一個男仔但發現性格不合，「都希望有個對的人出現，係長遠關係，唔好再尋尋覓覓，交個心出嚟又要裂開，好攰呀！」問到擇偶條件？她坦認同細個好唔同，「以前想揀啲好叻，好有背景或者幫到我，𠵱家反而想要簡單啲，我鍾意fashion boy，有潮流觸覺，最好有少少藝術細胞，鍾意音樂，一定要做運動。」至於對象使唔使好有錢？「男仔做返男仔嘅責任就得，唔使一定要好奢華嘅生活。」
Rainky又興奮透露跟偶像周杰倫旗下的上巿公司「巨星傳奇」合作推出瘦面機，更期待生意可衝出香港，不過暫時仍未有機會見到偶像，「唔需要見佢，佢幕後咁大個團隊，我反而希望可以同佢合作音樂，哈哈！」生意愈發愈大，問會否希望有日可上巿，她竟然話：「咁樣好攰，女仔唔好咁叻，我都希望拍到拖，哈哈！」
《星島頭條》新網站有更多精彩內容：http://www.stheadline.com/
最新回應