獨家丨謝君豪教演夫妻搵返初心：有啲嘢老奉㗎啦鄭中基邀任《機動兵工廠》導師　

2023-07-24 07:00

鄭中基（Ronald）為慶祝主理的網台「機動娛樂」成立3周年，特別舉辦《機動兵工廠》招募對演戲有興趣及熱誠的演員，經過多位星級嘉賓指導及揀選後，勝出者將成為網台合約藝人。最新一集有入行超過30年的影帝謝君豪任導師，好鍾意教學生的他覺得指導後輩之餘，又可以令自己搵返初心，「有啲嘢以為做咗咁多年，老奉㗎啦！其實唔係，最基本嘅嘢先係最重要。」採訪：杜杜攝影：朱偉彥

豪哥和Ronald都認為好多新生代演員都好用心學習，只是未夠經驗。

《機動兵工廠》已邀請了楊偉倫（阿卵）、蝦頭（楊詩敏）、周恩恩（配音導演）、陳茂賢（著名編劇及《不日成婚》導演）、梁雍婷及湯駿業出任導師。今次輪到經驗更豐富的謝君豪，拍攝當日是他首次見到6位學員超酸、阿杰、米奇、Edwin、何求及Wade，為了快速認識他們方便教導，甫到場即以一招「扮傻」來了解學員，「我喺化妝間偷聽佢哋講嘢，唔出聲「詐諦」食嘢，大概知道佢哋個人點樣，啲關係點樣。」

豪哥為了加快認識學員超酸（下右二）、阿杰（下右一）、米奇（上右一）、Edwin（下左二）、何求（上左一）及Wade（下左一），出動到偷聽這一招。

做戲最緊要準備工夫

偷聽完學員相處，豪哥再偷睇埋他們對戲，他跟Ronald在鏡頭後睇米奇和何求，拍攝一場夫妻在家相處戲份，兩人邊睇邊笑，因兩位學員表演得非常怕醜，完全唔似一對夫妻。豪哥笑言：「佢哋私底下好熟，但唔知點樣演夫妻，好怕醜唔識放鬆，擁抱都有少少唔習慣。」豪哥強調除了跟對手熟識，亦要增加對布景的熟識度，「嗰個景其實係佢哋屋企，開頭佢哋都唔係好習慣，好似都唔知係佢哋屋企咁，好陌生，應該要好熟，邊個坐邊度應該有晒默契。」他和Ronald拉埋兩個學員一齊睇playback兼畀意見，「記住戲唔可以斷，自己喺個腦度過一次。」

豪哥和Ronald在鏡頭後觀察學員表現。

豪哥和Ronald發覺有好多問題，即拉埋學員一齊睇playback從旁指正。

既然表現未達標，豪哥即落場指導，連夫妻間的親暱舉動都示範一次，經豪哥指正後學員明顯有進步，令他好開心，「唔會一定做到識飛咁，但呢個第一次可以畀佢哋累積經驗，一日裏面真係睇到啲成果，學員由唔係好熟演戲，再對個布景建立咗感情，對佢哋嚟講係好好經驗，做戲要同身邊對手好熟，同劇本好熟，同環境要好熟，如果唔係無從投入，除非好有經驗，一埋位就得，但唔係咁多呢啲人，開頭要做好多準備工夫，呢啲就係準備工夫。」

豪哥示範點樣做親熱戲份，學員好留心聽講。

女學員米奇和何求經豪哥指導後，演起夫妻自然得多。

做老師可以教學相長

豪哥和Ronald見學員做得開始似樣都好滿意，兩人異口同聲話：「演兄弟、夫妻、父子嗰啲一定要主動啲去溝通。」豪哥見到學員進步最有滿足感，「劇本又唔熟，自然會用好多假動作掩飾自己嘅忘記，哈哈！假動作自然好假，佢又知做得假喎，就會做得唔好，但慢慢熟咗，佢哋已經記得晒啲對白，亦都信任對手，就會好放心，愈做愈好。」年前曾在浸會大學出任戲劇導師的豪哥愈講愈興奮，坦認好鍾意執教鞭，「畀我最大感受唔係我教人，係講返畀自己聽，溫故知新，有啲嘢以為做咗咁多年，老奉㗎啦！其實唔係，最基本嘅嘢先係最重要。就係呢四個字教學相長，我哋忽略咗好多最基本嘅嘢，原來呢啲先至係最重要，呢個就係初心。」

豪哥除了教戲，還跟學員分享多年工作經驗。

拍攝完畢，學員仍拉住豪哥問功課，他亦樂於解答。

既然豪哥鍾意教，Ronald都好想他再上節目同學員分享，但大呻有難度，「佢好忙呀！哈哈！你知佢一路開緊工，日夜顛倒會好攰，豪哥真係好好，抽咗差唔多半日畀我哋去教學員，真係好多謝佢。」君豪答：「唔好咁講，我自己都enjoy㗎嘛！」身為「廠長」的Ronald即刻安樂晒，「咁就好啦！」又稱睇見學員有好成績特別開心，「上一堂有其他導師未熟學員，睇唔到佢哋有任何進步，但當我講畀佢哋聽每個學員最初係點，啲導師就話冇呀！頭先睇佢哋冇你講嘅問題喎！」豪哥認同：「即係佢哋進步咗囉！」Ronald好滿意：「起碼佢哋袋到啲嘢走，點都學到啲嘢，一定會有用嘅。」Ronald預告下周將是學員「終極一戰」，更搵來吳君如和導演莊文強做嘉賓，選出最後勝出的學員，「最尾係會簽一個，𠵱家睇嚟好難揀，留返畀嗰晚啲評判。」豪哥即笑Ronald，「將個波交畀佢哋，哈哈！六個揀一個都難呀！」