獨家丨黃秋生自認厚顏出自傳:演員仔有咩咁巴閉 讚游學修肯做有諗頭可撈埋廣告
2023-07-21 07:00 
黃秋生擔任藝術總監的「神戲劇團」十周年，慶祝活動包括秋生跟游學修首度合演舞台劇《極地謎情》，入行41年的秋生亦會推出首本自傳《秋生回憶》，當事人笑言是厚顏無恥之舉，以及舉行劇團攝影展覽順道為自傳舉行簽名會。本年度財政預算案，政府將注資5億元支持香港創意產業，鼓勵更多跨界別合作，秋生就笑言，「每個界別都未做得好，跨乜嘢界別先得㗎。」採訪：杜杜 攝影：羅安強 髮型:Taky Chung(秋生)、Ray Mork(阿修)@AdmiX Hair Styling 化妝: Jolinn Ng(秋生)、Julie.H @JLAB(阿修) 服裝:YOHJI YAMAMOTO HOMME(秋生)、NEEDLES、EXI.T(阿修)@ithk 場地:柏斯音樂
秋生搵阿修合作源於去年一次飯局覺得好啱傾，而選擇改編法國編劇Éric-Emmanuel Schmitt作品《Enigma Variations》，除適合兩人演出外，還因秋生在2012年跟梁祖堯合演過（當時譯作《極地情聖》），「冇乜幾多劇係兩個人做，嗰時做得唔係好滿意可以再做。」阿修直言近年演出機會唔多，難得跟前輩合作開心到震，「開頭都未知個戲由頭到尾淨係得兩個人演，知道更興奮，所以即刻應承。」
秋生稱未夠班出自傳
去年秋生在台灣書展推出小說《黎根的天台》，今年的香港書展就有《秋生回憶》，秋生認為戲劇界泰斗鍾景輝或者桃李滿門的毛俊輝才夠資格出自傳，只是劇團行政總監張佩華提議才勉強應承，「我邊有資格啫！一個演員仔，牙擦擦，好多人都有好多故仔，我覺得冇咩咁巴閉囉！做咩整本書煞有介事咁，阿茂又出一本阿壽又出一本，何東嗰啲幫佢寫一本就值得，我呢啲算係咩？！既然都做咗，就厚顏無恥做埋落去！」
今次出書秋生搵人代筆，若有機會再出會親自寫，而為配合自傳秋生搵返大批舊相，但認為若再睇返剪報會有更多回憶，「睇返啲剪報就會記得幾時鬧過啲咩人！又俾邊個鬧過呀！鬧啲咩，我又發啲咩神經呀！」因首次舉行簽名會，秋生最唔希望遇到癲人，怕自己識功夫出手太重，「我揼咗你我都唔覺，唔係兜斗巴星咁簡單，打落去就截脈㗎，即刻冇血到，所以千祈唔好，我怕呀！」至於會否有熱情粉絲埋身會否？「我又唔係鏡，又唔係燈，又唔係門，唔會啦！我都想有。」
相士批秋生桃李滿門
叫秋生及阿修為對方構思一個新的工作方向，前者認為阿修做廣告會好成功，「佢有諗頭嘛！有觸覺又肯做，可惜𠵱家香港啲廣告死得七七八八！」阿修表示主理網台《試當真》都要度廣告，但絕對唔易做，「我做廣告應該會好躁！」挑通眼眉的秋生完全明白，「個客呢個一句嗰個又一句，你要乜人哋咪做畀你！你又話唔係咁唔係咁，你自己做嘞！」阿修狂點頭，「所以我咪會好躁囉！」
阿修就覺得秋生最啱做老師，秋生即搶答：「咁就瓜得啦！」阿修解釋：「有啲人就算幾叻，但唔識教人，但係佢會知道你差啲乜，再表達畀你聽，同埋佢主張唔好懶深奧，會用一啲簡單嘅方式去講。」因為綵排阿修先發現秋生這個優點，「佢會好多分享，譬如角色研究方面，戲劇世界好多嘢神化咗，而秋生哥主張唔使咁神化，作為老師，佢教嘢應該會好叻。」近年keep住開戲劇班的秋生笑言都是時候轉行開學校，「以前批命嗰啲都話我最後係做老師，桃李滿門㗎！哈哈！搵吓錢，冇錢啦！」
阿修讚政府創意計劃
政府自2009年推出「創意智優計劃」，截至2022年9月底已撥出近23億元，資助創意業界在本港和外地舉辦約650個項目，約1300家中小企受惠，創造近3萬個職位和超過8萬個培育機會。早前公佈的《2023-2024財政預算案》，政府將計劃注資5億元落「創意智優計劃」，支持香港創意產業的發展，鼓勵更多具創意及文化底蘊的跨界別、跨領域合作項目，提升香港流行文化的影響力。
問兩人對此有何意見？秋生認為要跨界別合作，首先要每個界別都做好先，「每個界別都未做得好，跨乜嘢界別先得㗎！同埋舞蹈界同文學界合作，一路都做緊㗎啦，我哋表演同文學界嘅合作咪劇本囉！舞蹈就同音樂囉，不嬲都做緊㗎！出嚟講嗰個唔識囉！」而阿修就話唔明白有關計劃，所以畀唔到意見，但笑言：「佢哋做得嘅嘢一定係好嘢嚟，佢哋加油！」
《星島頭條》新網站有更多精彩內容：http://www.stheadline.com/
最新回應