星8卦｜「王子」用盡計謀扮病自保 睇準時機專揀紅人幫自己上位

「王子」近年走勢凌厲，而且呃呃氹氹技巧驚人，不過好多明眼人都話佢上得快係有原因。好似早排病到死，「王子」全面休息，其實都係詐病，只因為佢份人好跟住潮流走，對網上走勢好留意，全部都係話佢見錢開眼，密密割禾青唔認真，於是度橋自己停自己。最衰係之前老闆都唔肯畀錢佢揮霍，「王子」用盡方法令到老闆聽晒佢嘅鬼話，但今次佢見勢色唔對，就自己叫停，損失梗係有，但老闆知佢搵到錢，就當無件事。

「王子」用心機幫自己都唔係第一次，成日將自己嘅利益計到最盡，然後扮真誠扮可憐將見多識廣一樣老謀深算嘅大老闆都玩弄於掌股間，好似未係而家嘅地位時，佢第一時間就巴結「金蛋」，想當初日日埋身，早請安晚問好，「金蛋」將佢帶喺身邊真係幫咗唔少，但近年已經絕少見呢對孖公仔走埋一齊。

好多人問起「王子」做乜唔出現，「金蛋」了然在心，好淡然講句：「我過咗氣啦！」即係話要利用嘅價值已經用晒！今日「王子」以長輩身份埋咗「後起之秀」嗰邊，一來合時勢，二來跟紅頂白係佢專長，果然又幫佢收咗一班粉，你咪話佢唔叻呀！

 

【相關文章】：

星8卦｜「人妻」食仔無數 老公唔怕戴綠帽有苦衷

星8卦｜「大姐大」後生專做第三者搵刺激 老嚟免費送外賣無人要

星8卦｜「哥仔」捱足幾年 北上搵真銀 睇通市場價值撻訂不回港

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ