獨家丨36C沈殷怡露膊甜笑引死兵仔直擊Viu女神同斯文男連走兩場慶生

2023-07-18 07:00

有學歷有身材的沈殷怡（Shirley），2020年因在節目《美女郊遊遊》穿性感永衣行山而彈起，播映中的旅遊節目《入島日本喇！》又有性感浸溫泉場面，呢位「ViuTV女神」經常派福利，認真唔話得。上月22日是女神的29歲牛一，聲稱單身的她跟圈外斯文男友人食飯慶祝，雖然未見兩人有親暱舉動，但斯文男又送玫瑰又獲賜跟女神於正日慶祝生日，未坐正應該機會都唔低，加油呀。撰文：本報記者

2020年，Shirley跟陳欣妍齊穿性感泳衣主持《美女郊遊遊》。

Shirley跟和泉素行在旅遊節目《入島日本喇！》齊浸溫泉。

父親是前律政司副刑事檢控專員沈仲平的Shirley，DSE考獲37分獲全額獎學金入讀上海復旦大學法律系，再回港升讀香港中文大學法學碩士。背景好學歷高， Shirley副偈仲要非常Top，36C加超長腿，公平咩！？翻查資料，入行以來零緋聞的Shirley，曾透露最鍾意斯文男仔，如MIRROR的Jeremy（李駿傑）。

擁36C好身材的Shirley，經常公開派福利。

Shirley在港版《社內相親》中，跟Edan有親熱戲。

壽星女開綠燈

當晚約7點，着住黑色露肩連身裙的Shirley和着住白恤衫黑褲襯波鞋的斯文男，現身旺角快富街的咖啡館，兩人各點了凍咖啡，全程有講有笑，不過做開主持的壽星明顯多嘢講啲，手口並用，更不時跟住現場播放的迪士尼音樂搖擺自己，仲講到做晒V字手勢放面豬旁，加埋個甜甜靚樣，斯文哥應該心跳加速唔知點算好。望多兩眼，Shirley身旁仲放咗一紥玫瑰花，呢位斯文哥好識做喎。兩人傾到近8點，斯文男去完洗手間後埋單離開，男方負責攞花，女方戴返口罩就跟高佢少少嘅斯文男一齊走。

Shirley對住斯文男舉起V字加甜笑，引死人咩！？

斯文男去洗水間，Shirley即覆短訊。

兩人坐了一個鐘，斯文男埋單後攞埋花，等埋Shirley戴返口罩離開。

從Shirley的ig可見，佢亦有貼出生日正日的慶生相，同樣嘅衫及花，但場地換咗日本餐廳，並留言：「謝謝你們讓我把生日過成生日月。」hashtag係spoiled，睇嚟被寵壞的Shirley跟斯文男嘆完啡後，再齊食日本菜慶祝。雖然兩人表現未算親密，但生日正日同斯文男仔連踩兩場，明顯開行綠燈畀男方力追，恭喜定Shirley先。