專欄｜女足世界盃睇實英美德

女子世界盃即將開幕。無疑，女足號召力無男足咁厲害，但近年女足水平不斷提高，組織傳控有番咁上下，有靚女睇就錦上添花啦！

先講奪標大熱門美國隊，絕大部分球員嚟自本土聯賽，年紀都偏大，但對上8屆有4次成為冠軍，實力舉足輕重。有咁輝煌嘅成績，全因13號前鋒阿歷士摩根嘅強勁入球能力，代表國家隊上陣207次入121球，係目前球隊入球最多嘅球員，唔好睇小呢位34歲嘅媽媽，速度同入楔能力非常出色。

英格蘭前年改由域雯執教，結果拎到史上第一個歐國盃，呢位荷蘭籍領隊功力相當深厚。球隊雖然有東妮、羅素等新星崛起，但缺少經已掛靴嘅入球機器愛倫韋特，攻力可能打啲折扣。

歐洲傳統勁旅德國隊，大部分球員嚟自拜仁慕尼黑同禾夫斯堡兩大國內強隊。值得留意嘅係隊長兼首席射手波普，瞻前之餘亦會顧後，經常勤力回防，係球隊嘅定海神針。20號中場馬古嘅進攻能力，同樣唔能夠睇小。

西班牙、荷蘭同東道主澳洲都值得留意，艾爾有機會再同各位分享。總之，今屆女足世界盃相當精采，大家一定要睇實「猜波台」嘅直播呀！艾爾

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ